Como Presidente di Comision Permanente di Husticia di Parlamento di Aruba, Parlamentario John Hart a sostene un encuentro di trabou cu señor Dick van Leenen di Afdeling Speur- en Specialistische Dieren di Nationale Politie di Hulanda. E reunion a enfoca riba intercambio di conocemento y exploracion di oportunidadnan pa fortalece diferente capacidad den cadena hudicial di Aruba.
Segun Hart, e encuentro ta forma parti di e esfuerso continuo pa mantene y amplia e relacionnan strategico cu partnernan den Reino Hulandes.
“Den cuadro di fortalecemento di nos relacionnan strategico den Reino, e bishita aki ta destaca e importancia di mantene lasonan solido cu nos partnernan. Cooperacion y intercambio di conocemento entre nos institucionnan ta esencial pa sigui fortifica nos capacidadnan y nos cadena hudicial,” Hart a declara.
Durante e reunion a discuti diferente aspecto relaciona cu e rol specialisa cu unidadnan canino di polis por desempeña den sostene e trabounan di investigacion, control, persecucion y siguridad.
Hart a señala cu den e ultimo seis lunanan, Aruba a ricibi tres cacho policial como parti di e maneho nobo dentro di sector di Husticia. Segun e parlamentario, esaki ta un ehempel concreto di con colaboracion efectivo den Reino por contribui directamente na fortalecemento di nos institucionnan.
“E inversion den capacidad y cooperacion ta produci resultado concreto. E yegada di tres cacho policial pa Aruba ta mustra cu door di traha hunto nos por crea instrumentonan adicional pa asisti nos autoridadnan den e importante trabou cu nan ta desempeña diariamente”, Hart a expresa.
Un di e temanan cu a lanta interes durante e encuentro tabata e posibilidad di explora den futuro experticio relaciona cu cacho specialisa den migracion y control na frontera.
Segun Hart, diferente paisnan ta uza unidadnan canino entrena specificamente pa detecta y localisa persona den circunstancianan particular, incluyendo operacionnan relaciona cu migracion ilegal y entrada iregular via costa.
“Aruba, como isla cu tin frontera maritimo amplio, mester sigui evalua tur instrumento moderno cu por contribui na siguridad y control efectivo di nos frontera. E conocemento y experiencia cu ta disponibel den Hulanda por brinda perspectivanan interesante pa futuro desaroyo di nos capacidadnan local”, Hart a indica.
E parlamentario a enfatisa cu e encuentro no tabata enfoca riba implementacion inmediato di medida nan specifico, sino riba intercambio di informacion y exploracion di posibilidadnan cu eventualmente por fortalece e trabou di nos autoridadnan.
Hart a gradici señor Dick van Leenen pa su apertura y disponibilidad pa comparti experiencia y conocemento profesional.
“Nos mester sigui wak con otro paisnan y institucionnan ta enfrenta reto similar y cua bon practica nos por adapta pa nos realidad local. Fortalece nos cadena hudicial ta un proceso continuo cu ta pidi colaboracion, innovacion y boluntad pa sigui siña,” Hart a conclui.
