Tur aña riba 22 di april nos ta celebra Dia di Mama Tera, e tera cu a bin ta provee nos cu bida, nutricion y proteccion durante siglonan. E aña aki, celebracionnan di e dia special aki a cuminsa cu entusiasmo riba diasabra ora miembronan di comunidad a uni pa honra e pida baranca cu nos ta comparti cu otro.
Cu un serie di actividad y iniciativanan, diferente organisacionnan a bin ta promove sostenibilidad ambiental fomentando participacion civico. Diasabra 20 di april, Ministerio di Naturalesa a contribui na diferente actividad den cual pueblo di Aruba por a participa.
Baki den Bario, ya caba activo desde aña pasa september ta un iniciativa den cuadro di e campaña nacional ‘Limpi Limpi’ unda ta stimula separacion di desperdicio di nos ciudadanonan. E biaha aki Baki den Bario tabata na Veld di Bubali na Noord di 7’or te cu 11’or di mainta bou direccion di Bureau City Inspector.
E proyecto di Minister Arends di agroforesteria na scolnan basico tambe ta den pleno ehecucion unda cu e biaha aki a toca turno di St. Paulus School na San Nicolas. Di 7’or di mainta te cu 1’or di merdia, maestronan, studiantenan y boluntarionan a yuda crea un hardin di alimentacion. Un proyecto bou guida di Santa Rosa Aruba y Living Soil Aruba pa apoya scolnan basico na incorpora actividadnan di sector primario como herment educativo. Un danki special na director Sr. Randy Arends, cabesante di St Paulus pa nan colaboracion.
Tambe ariba e dia aki Universidad di Aruba a organisa un “Earth Day Clean-Up” unda studiantenan a reuni den e bario di rancho pa yuda tene Aruba limpilimpi. Na otro punta di Aruba, Aruba little Volunteers tambe tabata tin nan accion di limpiesa na Bachelor’s Beach. Aruba Little Volunteers ta un organisacion creciente cu ta siña nos muchanan tocante e balor di contribucion comunitario y mantencion di nos medio ambiente.
“Cada accion chikito ta conta. Laga nos bini hunto pa celebra nos medio ambiente, recordando cu nos esfuersonan colectivo di awe ta yuda forma e mundo di mañan. No solamente ariba Dia di Mama Tera pero sigur nos mester ta consciente cu Aruba su compromiso pa un miho proteccion ambiental ta cuminsa cu cada uno di nos, den nos accionnan di tur dia,” Minister Arends, encarga cu proteccion di Naturalesa.
Minister Arends ta gradici tur residente cu a sali y participa den e eventonan aki, demostrando nan compromiso pa nos naturalesa y e sostenibilidad di nos isla. Laga nos keda uni pa haci un impacto positivo riba nos comunidad.
