Tabata diamars anochi pa mas o menos 8:09 pm ora cu dos persona a drenta un cas na Malmok. Imagen capta riba camara di siguridad ta mustra dos hende homber relativamente hoben bisti cu handschoen tabata wak rond. Ambos tabatin shirt color scur manga largo bisti. Un di nan tabatin un short khaki y e otro un short shinishi. Un tabatin pechi bisti y e otro por mir’e bisti cu su capuchon color preto den e video.
Ta trata di un pareha jong di Texas cu tabata riba nan honeymoon y kedando na e cas. Nan tabatin un casamento chikito y a bin Aruba pa celebra nan amor. E dos individuonan a horta un cantidad substancial di placa como tambe dos GoPro.
Ta pidi ayudo di cualkier hende cu por sa algo di e dos individuonan aki cu a drenta nan luga di estadia y horta nan pertenencianan. Ta mas cu claro cu despues di un suceso asina, bo no ta drumi trankil. Ta ofreciendo un recompensa di AWG 500,- pa informacion cu por conduci na detencion di e dos hende hombernan aki. Pa cualkier informacion of tip, por tuma contacto na +297 593 1774.
