Bingo Aruba a uni na SMAC pa Carnaval 70. E evento di fundraising aki ta pa tur carnavalista, musico, participante di prins y pancho como reina. Meta di esaki ta pa yuda esunnan cu ta participa den carnaval cubri nan gasto, pero tambe yuda e comision haci Carnaval 70 mas grandi. Di biaha SMAC a anuncia programa di Carnaval 70, cual ta ranca sali na november.
Darren van Ommeren, presidente di SMAC, a splica hunto cu Bingo Aruba nan a lansa un fundraising pa tur carnavalista, grupo, musico, prins y pancho, reina. Pa prome bes ta haci esaki den combinacion cu Bingo Aruba. Concepto dje Bingo fundraising ta uno completamente nobo. Bingo Aruba conhuntamente cu SMAC ta duna oportunidad carnavalista, musico di tur genero, prins y pancho, reina recauda fondo pa cubri nan gasto of participacion pa Carnaval 70. E temporada ainda ta duro pa tur y p’esey a bin cu e idea aki. Esaki ta pa tur hende yuda nan mes, pero tambe yuda SMAC haci Carnaval 70 mas grandi di locual ta premira.
Ticket di BINGO
Na oficina di SMAC por haya tur ticket. Segun van Ommeren, e bendedo cu por ta un carnavalista, participante di cualkier grupo sea di hende grandi of mucha, cu ta contribui na carnaval, por acerca SMAC y bira un punto di benta riba nan mes pa loke ta trata e bingo.
Unabes cu bira e punto di benta ta ricibi un comision cu ta diescinco florin pa cada persona. El a splica cu por ehempel e participante por bende ticket di bingo pa cubri su participacion den carnaval.
Participa gratis den Carnaval 70
Frank Solognier, propietario di Bingo Aruba, a splica hunto cu SMAC nan ta produci un evento unda cu mayoria di esunnan cu ta participa den carnaval, por bay na un manera gratis otro aña den Carnaval 70. E persona no mester saca placa fo’i nan saco. Esey ta e intencion. Segun Solognier, Bingo Aruba su intencion ta pa yuda SMAC mas tanto posibel cu nan por sigui crece y haya mas fondo pa carnaval bira mas solido.
E evento ta tuma luga dia 11 di juni pa 5:00 pm, cual ta riba un dia normal di Bingo Aruba. E bingo aki lo ta uno grandi, pasobra ta bay tin hopi carchi den wega. Tur hende por hunga trankil diadomingo. Ta haya tres carchi pa wega. Pa comision, cada carchi bendi ta diescinco florin. Prijs di carchi ta 50 florin y tur otro ta pa cubri premio, mercadeo. Un parti ta bay pa SMAC organisa carnaval.
Bingo Aruba ta contento di por a yega na un acuerdo cu SMAC. Segun Solognier, a dura basta dia pa nan por a yega n’e acuerdo y nan ta cla pa cuminsa. Tur cos ta indica cu pa otro siman dialuna e carchinan ta saca oficialmente y di eynan tur hende por cuminsa bende como cumpra nan ticket.
