Diasabra mainta, pa mas o menos 11:30 am, ta ricibi informacion cu na Santa Cruz, na altura di ex-Rowigini’s a tuma luga un accidente, caminda cu un Hyundai a sali dilanti di un Hyundai I10, unda cu e ultimo a perde control, dal contra di un stupi y despues bay para mas pazuid di e luga.
Ta trata aki di un Hyundai colo blanco, numera A-45770, cu net tabata subiendo caminda. E no a ripara cu e i10, colo bruin, numera A-35458 tabata biniendo su direccion. El a dale di tal forma cu e chauffeur a perde control riba stuur, a pasa dal un pida stupi y a para un poco mas pazuid caminda cu e dalmento a tuma luga.
Chauffeur di e auto blanco a comenta cu e no a mira e auto bin cu e consecuencianan ya conoci.
Paramedico a presenta na e sitio pa atende e dos ocupantenan femenino den e auto bruin. Polis di trafico tambe a presenta pa asina pone su mes na altura y atende cu e accidente.
