ATECH un biaha mas a sa di surpasa tur expectativa cu participantenan tabatin di loke ta trata e ‘hottest tech conference’ di Caribe, atraendo mas di +600 participante internacional, local y tambe studiantenan.
“Nos hubentud ta e arkitectonan di nos futuro. Nos ta kere den nan y ta importante pa nos invest den nan awe. E generacion aki lo trece nos futuro lidernan y si ATECH por yuda inspira nan, motiva nan y cultiva den nan e spirito di ‘entrepreneurship’ of e balornan importante pa ta exitoso, sigur nos lo haci’e.” Varelie Croes, Co-fundado di ATECH a comenta.
Orador Nicole Kelner, fundado di GirlCode cu ta encurasha mucha muhenan desde 9 aña pa programa cu computer (of miho conoci como “code”), a duna 2 workshop di ‘Coding for Kids’, durante e dianan di ATECH Conference, cu a sa di atrae mas di 20 muchanan entre 8-12 aña cu tabata sumamente entusiasma pa siña code.
Un total di 28 orador internacional a sa di deleita fanaticonan di tecnologia como tambe entrepeneurs cu nan conocemento y experiencia den e area aki. Tabatin oportunidad pa intercambia experencia, ideanan cu otro empresarionan y a socialisa den e mundo di ‘startups’ , stimulando otro, y creando tecnologia nobo y diferente.
Si bo no tabata parti di e conferencia e aña aki, bo por volg algun di e presentacionnan ariba e pagina di ATECH riba facebook: www.facebook.com/ATECH y keda up to date pa loke ta trata un edicion cu ta priminti di bay ta mas grandi, otro aña.
