Siman pasa a sosode algo na un hotel di cadena internacional, cu a causa cu gerencia a dicidi di no kier mira un señora trahando eynan via di un agencia di trabou, mas den e facilidad. E caso tin di haber cu un peluche cu a perde y cu e huesped ta insisti pa hay’e prome cu e bandona Aruba. Bernice Lake ta traha pa e compania Excellence Manpower cu a pone na disposicion di Marriott Ocean Club, for di juli 2019 te cu dialuna ultimo. E final di e relacion di trabou el a hay’e via un mensahe di whattsapp, unda nan a bis’e pasa entrega e uniform di Marriott y busca su pago.
Tur esaki relaciona cu un incidente cu a tuma luga siman pasa diabierna ora cu e tabata haciendo cambernan limpi. A dun’e 4 checkout pero despues a cambia un di e numbernan, pero esaki no a keda registra riba su papel. Eynan e confusion a cuminsa, cu e no a corda cu e tabata un late check-out y a drenta e camber prome cu e hendenan a bay. Den e camber cu a cambia na ultimo momento, el a recoge tur cos cu no tabata den e camber y a pone nan den un saco preto y a bay laga e chupon cu un peluche, cu ta causa di tur e problema, atras den un di e dos camanan di baby cu tabatin den e camber. Den e camber tambe tabatin dos trahado cu a bin haci trabou den e baño.
Despues cu el a bay caba, su supervisor a yam’e pa inform’e cu e huesped, kende ta un VIP di e hotel cu 10 unidad cumpra, ta masha rabia pasobra no por haya e beer cu tabata pega na e chupon. Nan a listr’e, e saco y tur su pertenencianan y no a topa cu nada. Segun e señora ta conta, e dos empleadonan cu a keda atras den e camber tambe a sigura cu e chupon cu e beer pega na dje tabata den e camber ora cu Bernice a caba eyden.
Den e proceso cu a sigui, a interoga e empleada pa dos ora largo, lague sin come siendo cu e ta diabetico y mester come na ora. E huesped, el a conta, tabata na aeropuerto wardando pa nan hiba e beertje p’e, siendo cu e ta sigur cu esaki a keda den e camber. Despues cu el a haci e camber, e huespednan a bolbe eyden pasobra a resulta cu nan no a check out ainda.
Diasabra a manda e señora cas, suspendi, mientras ta investigando e caso y dialuna el a haya un mensahe via whattsapp cu e ta retira. Señora Bernice ta lamenta tur loke cu a pasa y e forma con e hotel y e supervisornan a atende cu e caso aki. Pero tambe Excellence Manpower cu no a haci ningun intento pa investiga di nan banda kico a pasa y a core bay di acuerdo cu e retiro di dje.
