Esaki ta un ruego y sclamacion cu ta sali for di mi corazon pa loke ta trata futuro di nos hobennan. Ki futuro nos pais tin? Unda nos ta hiba e pais aki? Ken ta responsabel?
Mi corazon a haci hopi dolor ora cu mi a tende loke a pasa cu un scol na Santa Cruz, mas tristo mi a bira ora cu mi a mira e imahennan di vandalismo cu ta ser comete door di hobennan. E base solido, di seguridad di un pais ta su enseñanza, anto si ta asina esnan mes cu mester di dje ta actua, anto ta kiko nos por spera mas di nan. Trata pa kima un scol completo, danki Dios cu e a ser limita na un parti so, pero cu dañonan grandi. Perhudicando esnan cu si ta desea di sigui den formacion di nan futuro.
Mi no por saca for di mi mente y e pregunta ta sigui draai den mi mente, kiko ta futuro di nos hobennan? Si nan a kier a haci daño na outoridad, na e cuerpo policial, anto nan a escohe e mal lugar pa haci esaki. Lemanan sumamente bergonsoso a keda marca ariba e murayanan di e edificio. Si bo no ta respeta outoridad, anto ta kende bo lo respeta anto?
Ta deber di un Gobierno tur despues di nos prestigioso Status Aparte, pa a pone mihor guia pa nos hobennan. Si nos a ser influencia door di culturanan di afor, si nos no a siña esnan cu a bin biba aki, con nos sistema ta hinka den otro, si nos no a pone reglanan ora cu nos ta duna nan permiso pa traha y trece nan famianan. Si nos sigui tuma influencianan di afor sin reclama, sin tin e desencia pa educa nan mihor, anto kiko nos por spera? Rumannan hopi hobennan awendia ta bin di famia kibra, na unda tata, pero den mayoria caso mama so tin cu preocupa den educacion di cas. Un responsabilidad grandi. Hopi Arubiano a duna stranheronan nan faam, na momento di a casa cu un stranhero.
E plan social cu ta representa nada menos 15 miyon florin te ainda no a presta na nada. Danki Dios cu tin fundacionnan cu hendenan boluntario cu ta purba di hiba campaña di concientisacion y guia na nos hobennan, debi cu for di Gobierno nada ta ser haci. Si departamento y servicionan di Gobierno ta traha optimal, anto no mester di fundacionnan. Aparato Gubernamental ta pesta cu hende, kiko ta e resultado di nan trobow? Nan unda un ekipo consisti di tur gremionan di nos pais ta keda o esaki ta keda na reunionnan sin resultado. Cada cu algo pasa nan ta lanta cabez y despues ta bolbe bai den un winterslaap. Pueblo ta paga pa boso produci y produci, principalmente cu pueblo ta pasando den un situacion ecomico, social hopi malo.
Mi preguntanan ta con un mucha di 11 aña ta pone henter un skol ariba un alerta cu un menasa serio? Ta con hobennan ta menasa y insulta polis cu lemanan fuerte y duro y despues kima parti di un scol? Ta con hobennan ta atraca ancianonan y laga nan herida? Ta con atraconan ta keda luz di dia? Ta con nos pueblo por sigui biba den un inseguridad completo? Ta con nos tin un helicopter cu ta core anochi y no tin luz pa luza loke nan ta buscando? Ta con tin tanto droga ariba nos pais, pero di tur sorto? Ta con pueblo ta wak cu droga ta ser bendi publicamente y esnan cu mester controla y investiga no ta wak esaki? Ta con ta sigui traha hotelnan y sigui importa mas hende y haci nos pueblo mas pobla, mas gasto? Ta con medionan no ta yuda den educa pueblo, pero ta sigui hunga politica y mas politica? Pregunta principal, ta con despues di Status Aparte, politiconan ta lucha, bringa, ser domina, complace compinchinan pa poder y mas poder, specialmente pa propio beneficio? Ta di con tur dia e mes un canticanan cu cos ta malo, malo y no ta drecha esaki o ta duna nos pueblo speranza? Ta con tin tanto suicidio cu no ta ser publica, pa motibo di depresion? Ta con tin tanto miramento di carta, obra di satanas? Ultimo, pero interesante pregunta ta dicon tanto secta, pero hasta den sala di un cas, kitando tur luna 10 % porciento un un humilde trahado, mayoria den man di inmigrante, un negoshi tog cu nos Salbador?
Rumannan esakinan ta algun pregunta, pero tin hopi mas.
Ami tin un solo contesta, nos hendenan a bandona Dios, hasta nos politiconan. Wak e milager na e skol cu nan a kima. E bijbel, un oracion y un cuadro religioso a keda intacto.
Nos politiconan mester ta para na rij pa ofrece nan ayudo, unda nan a keda, cu excepcion di un man yen?
Rumannan Dios ta stima nos y Mama Maria ta proteha nos, pero hopi tin nan bandona.
Boso ruman cu stima y reza pa boso tur dia. Atan Lee sr.
