El a baha boluntariamente/obligatoriamente, asina un fuente for di e Hunta di Supervision di Aruba Airport Authority a informa nos. Rafael Croes, cu apenas algun luna pasa, despues di cambio den Gobierno, a tuma e posicion di Presidente di e Hunta di Supervision. E tin un relacion masha estrecho cu Ministernan Dangui Oduber y Glenbert Croes. Pero e relacion ey no a scap’e un mocion di desconfiansa den su mesun directiva, cu a coste su cabes.
E Hunta di Supervision di Aruba Airport Authority N.V. tabata encabesa pa Rafael Croes como Presidente, abogado Sven Faarup, experto financiero Ruben Giel, e comerciante Hubert Dirks y e bankero Marion Kan, cu durante e Gobierno anterior tabata Presidente di e Hunta di Supervision. Awor despues di e retiro inmediato di Rafael Croes, mesora a instala Marion Kan atrobe como Presidente, den forma temporario, te ora haya un otro candidato.
Rafael Croes ta un figura conoci den comunidad. E ta doño di JR Auto Center pero ta mas conoci pa su programa na television “Al Caso” cu ta pasa via Tele Aruba. Antes e tabatin programanan similar na radio tambe. E no ta usual na Aruba cu figuranan di medionan di comunicacion ta ocupa funcionnan politico den directiva di companianan priva di Gobierno. Ta bisa politico pasobra den e rol di Presidente di Hunta di Comisario, Rafael Croes tabata raporta directamente na Minister Dangui Oduber, bou kende e compania aki ta resorta.
E problemanan cu Rafael Croes tabata multiple, no solamente cu Schiphol Group, pero tambe tabata sigui ordo di Minister (y no necesariamente di Minister Dangui Oduber) pa tuma empleado den e compania priva. Esey no a cay den bon tera pasobra Aeropuerto ta memey di un inversion multimiyonario y como tal no por ta bou presion ni metemento politico. Por lo menos un miembro di e Hunta di Supervision, cu e Gobierno aki mes a apunta, a presenta un mocion di desconfiansa contra Croes y el a haya sosten di dos miembro mas pa hunto bira 3 cu ta e mayoria. Rafael Croes e ora a haye obliga na tuma su retiro “boluntario” for di e puesto politico cu e tabata ocupa den Aruba Airport Authority.
Mientras cu ta sperando pa Gobierno nombra un otro miembro na su luga, e 4 miembronan cu a keda a dicidi p apunta Marion Kan como Presidente temporario. Tin un chens grandi cu e mes lo sigui den e funcion ey tambe, mirando su trayectoria largo y experencia den e ramo financiero, locual ta precisamente loke mester awor memey di un proyecto asina grandi di ampliacion.
Rafael Croes ta bira e prome miembro di Hunta di Supervision di Gabinete Wever-Croes cu ta haye ta tuma retiro mesora, pa evita cu ta retir’e obligatoriamente. “Su funcion a dura solamente 6 luna”, asina un colega a aclaria.
