RCA vs Dakota, un ripiticion pa loke ta e final di e temporada pasa, cu ambos ekipo, siendo e mihonan di e campeonato aki. Algun cara nobo si nos mira e elenco e aña aki cu e start e wega. Stadion di Frans Figaroa tabata yena di fanatico pa ambos banda.
Prome tempo
Ambos ekipo a cuminsa cuateloso, cu RCA den e prome 5 minuutnan un tiki mas confidente cu Dakota. Un tiro di delantero Linscher den dos intento a ser wanta pa portero Bautista.
Mester bisa cu nos no a mira mucho tiro riba gol y atakenan bon crea pa anota gol. Hopi balanan largo sin mucho presicion y cu mayoria biaha tabata perdi. Delanteronan di ambos ekipo no a haya mucho espacio pa haci hugada y tabata wordo bon marca pa e linea di defensa. Dado momento, Dakota cu a crea un oportunidad cu un bon tiro di defensor Donata pero portero Adbul a wanta esaki bon. Mucho mas no a pasa den e prome tempo cu dos ekipo basta pareu pero den un futbol caminda nos a spera mucho mas.
Di dos tempo
Nos por a mira mesun patronchi di wega cu Dakota un tiki mas miho den e parti medio campo. Dado momento Dakota tabata yega facil den e area penal di RCA pero no a crea mucho chens. Di otro banda, RCA hungando e bala largo buscando e delanteronan Silva y Linscher.
Na di 63 minuut, delantero John Silva ta anota e 1 – 0 pa RCA ora cu e ta domina un bala den e area penal y cu un tiro medio chilina e ta sorprende portero Bautista unda e bala ta pasa riba su cabez. Na di 78 minuut, Dakota a haya un bon chens pero e cruse tabata demasiado duro y aki e bala ta pasa tur hende bay. Un rato despues un tiro liber di Hogde por poco ta sorprende portero Abdul.
Mester bisa si cu Dakota a pone un presion formal buscando e gol di empate y RCA defendiendo cu alma y cuerpo. Lo imposibel ta pasa na di 90 minuut ora cu e medio campista Briceño di Dakota ta empata e wega cu score di 1 – 1.
Extra tempo
Den e extra tempo e desgaste tabata notabel cerca tur dos ekipo. E cansansio e hunga un rol grandi mientras e ritmo di wega a baha. Tur dos ekipo mas cu claro a forsa pa hinca e gol mirando cu no tin mañan. Albert Francis y Ricky Hodge a medio haya chensnan chikito. Den e di dos mita di e extra tempo, RCA ta bay dilanti 2 – 1 ora cu un cruse di Marc Jacobs ta wordo bon cabesa pa Albert Francis unda portero Bautista no por a haci nada cu ne.
Na e pitaso final, referee Matos ta caba e wega den un momento kizas no adecua y aki un bululu formal a start entre e hungadonan di ambos ekipo. A start un pelea riba veld, dilanti tur fanatico, mandandi un mensahe robes y sirbiendo como un mal ehempel pa nos muchanan. Jammer pa un final entre dos ekipo asina grandi caba di e forma aki!
Tocante SV Dakota
SV Dakota ta existi desde aña 1947 caba y durante e su trayectorio a sa di logra conkista e titulo di campeon di futbol division di honor na mas di un ocasion den pasado. E ultimo biaha cu el a bay cas cu e trofeo tabata na aña 2022. E organisacion ta conta cu futbolistanan di tur edad, cuminsando cu Mini baby, Baby, Lifida A, Lifida B, Menor, Mayor, Junioren, Damas y Division Honor. Na tur ta papia di mas o menos 175 hungado den total. Den e seccion di Division Honor, ta conta cu un ekipo cu 25 hungado, 4 staff tecnico y 4 miembro di directiva. Coach ta Jonathan Lake cu ta conta cu un amplio experiencia den futbol local.
Tocante SV Racing Club Aruba
A funda SV Racing Club Aruba (RCA) dia 15 di februari 1934. E team a sa di crece den e ultimo 85 añanan te bira un organisacion di riba 300 futbolista. Nan ta parti den division di infantil, hubenil, hoofdklas, damas, 35+, 40+ y 50+. E ekipo ta conta cu cu no menos di 25 futbolista cu ta hunga den e division di Honor.
Historia a conta nos cu den pasado, e ekipo di RCA a logra titula campeon na 33 ocasion. E ekipo di RCA ta e prome campeon di pais Aruba na aña 1986 y ta e prome team di Aruba pa bira campeon Antiano na aña 1966. E ultimo biaha cu SV RCA a bay cas cu e trofeo di campeon tabata den e campeonato di aña 2019, e tempo ey contra Deportivo Nacional.
Tocante AVB
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.
