Awe tardi a sosode un accidente pisa na Savaneta entre un auto y un brommer. Manera e situacion ta mustra, falta di dunamento di preferencia a causa e desgracia. Ambulance a yega mesora y a transporta e herido cu urgencia pa hospital.
Mirando orario di e accidente, a causa fila largo riba e caminda grandi di Savaneta di chauffeurnan bayendo cas despues di trabou.
Segun por a compronde, e auto marca KIA modelo Rio tabata biniendo for di Marinierskazerne y a crusa caminda pa bay cumpra pizza. E chauffeur ta bisa cu el a mira ambos banda di caminda prome cu el a crusa caya. E brommer biniendo di San Nicolas a dal den su banda.
Tanto e auto como tambe e brommer a keda hopi destrui. Condicion di e victima no ta conoci ainda. Prome instante tabata papia cu e ta grave.
