Durante campaña a mira promesanan haci cu ainda un cantidad di tata y mama ta pendiente pe. E mayornan mes ta pidi pa trece e informacion aki pa recorda MEP riba nan promesa. Por ehempel Luigi Bergen a core un campaña fuerte den nomber di MEP riba e airco geld y tambe school geld.
E politico di MEP hasta a traha borchinan grandi pa fortifica su intencionnan. Tempo cu e tabata docente tabata protesta fuertemente y hasta saca muchanan di klas na EPI pa protesta dilanti parlamento of bestuurskantoor. Hopi biaha contra e pagonan cu tabata tin pa cu enseñansa. E campaña pa eleccion 2017 a cuminsa y Luigi Bergen a traha borchinan gigantesco pa asina mustra pueblo cu si MEP drenta gobierno e school geld y airco geld ta pa pasado.
Mientrastanto e situacion despues di dos aña escolar cu MEP den gobierno ta diferente cu e promesa di MEP y Luigi Bergen. Te awe tin mayornan cu mester paga ambos y tin mayornan cu mester elimina e debe di schoolgeld di e aña anterior y e nobo pa asina nan yiu por drenta klas. Full lo contrario di e promesa haci cu a contribui na e votonan extra cu e partido MEP a haya ultimo eleccion.
