Luigi Bergen mes kier drenta Parlamento pero ta pidiendo Sue Ann Ras pa keda

Den seno di MEP e interes ta keto bay pa Sue Ann Ras reconcilia su decision y no entrega su stoel como parlamentario. Ta prefera su presencia cu esun di Luigi Bergen. Fuentenan envolvi den e desaroyonan relaciona cu Sue Ann y Luigi Bergen, a confirma na nos cu den seno di MEP ta prefera Sue Ann Ras keda.

A purba tur manera pero parce te cu awe Sue Ann Ras ta dicidido. Si ta bon Parlamento su reces a caba y tur hende mester ta bek na trabou. E porta a keda habri pa asina Sue Ann Ras cambia di pensamento. Si tin reunionnan publico, MEP y resto di Coalicion mester zorg pa garantiza presencia di mayoria di 11 asiento si Sue Ann Ras no presenta.

Of mientrastanto Sue Ann mester keda bin parlamento pa asina duna e coalicion sosten. Sue Ann Ras mester entrega su carta na Parlamento riba su intencion pa retira. E carta aki parce no a drenta ainda. Asina mes Luigi Bergen ta dicidido pa drenta y ta para den porta caba pa asina cu Sue Ann Ras sali e drenta. Luigi Bergen a pasa den diferente problema personal cu a bay viral. Su mesun famia a pone su nomber den publicidad den un forma negativo. Esey mes ta e motibo cu a mande cas unda e tabata traha den Cocolishi.

Luigi y su pareha nobo conquista den Cocolishi a ser manda cas basta siman atras y no a bolbe mas. Parce cu esnan di MEP a pidie pa bay atende su asuntonan personal bon prome cu e drenta parlamento. MEP ta sinti e presion pasobra no por djis laga Sue Ann Ras pa Netflix y djey Luigi Bergen ta drenta cu henter un novela menos bunita riba su cabes. MEP kier purba keda mantene e integridad di e fraccion. Aunke a purba wanta Sue Ann y e peticion pa keda ta riba mesa, Luigi Bergen si a laga sa cu e ta cla. Asina cu Sue Ann Ras dicidi y entrega carta, conseho electoral lo manda notifica parlamento cu e ta siguiente candidato cu e derecho pa drenta. Ban wak kico ta e desaroyonan politico cu lo tin e dianan nos dilanti.

Ademas di e situacion di Parlamentario, tin tambe algun batata cayente cu parlamento mester atende y mescos gobierno cu e presion di Hulanda riba maneho, cumplimento y supervision financiero.