Esey ta tur locual ta orguyo , y esey ta locual Dios ta odia, caminda hende ta pensa cu nan por kibra tur ordo cu Dios a establece , haci locual cu nan kier, haci cambio den identidad, genero, sexo, rebaha e creacion di Dios, pasobra ta esey diabel kier logra cu orguyo, biba den rebeldia , sin somete, sin temor di Dios, y riba tur cos haci bofon y desobedece e palabra di Dios.
Bijbel tin masha hopi versiculo cu ta papia di orguyo, caminda ta demostra cu tur luho y detaye cu Orguyo ta un pica dilanti di Dios.
E temor di Señor ta pa odia maldad, orguyo, arogancia y mal caminda, y un boca perverso mi ta odia.( Proverbionan 8:13).
Ora cu orguyo bin, deshonor tambe ta bini, ma sabiduria ta cerca e humildenan.(Proverbionan 11:2).
Cada persona cu ta orguyoso di curason ta un pica pa Señor, siguramente e lo no keda sin castigo ( Proverbionan 16:5).
Orguyo ta bin prome cu destruccion y un spirito arogante prome cu caida.( Proverbionan 16:18).
Orguyo di un hende lo rebahe, ma esun cu ta di spirito humilde lo ricibi honor. ( Proverbionan 29:23).
Pasobra e malvado ta gaba di e deseo di su curason, e ta bendiciona hende golos y ta desprecia Señor. E malvado cu su cara yen di orguyo, no ta busca Dios, Tur su pensamento ta : No tin Dios. ( Salmo10:3-4).
P’esey scritura ta bisa: Dios ta resisti e orguyosonan , ma ta duna gracia na e humildenan. Santiago 4:6).
Dios ta resisti e orguyosonan pa demostra cu nan tin mester di Dios. P’esey e palabra di Dios ta bisa: humiya boso mes anto, bao di e man poderoso di Dios y e lo halsa boso na e tempo apropia.( 1 Pedro 5:6).
Awor kico ta bal un hende pa carnalmente gana un bataya aki na tera den bista di hende cu apoyo di ley, y perde bida eterna den cielo, y wordo destina pa condenacion eterno den fierno?
Pasobra palabra di Dios ta mustra nos den Romanonan 1: 28 kico lo pasa cu hende orguyoso: Y mescos cu nan no a haya necesario pa reconoce Dios, Dios a entrega nan na un mente perverso pa haci cosnan cu no ta cumbini. Y nos tur por lesa kico ta e cosnan cu ta bini riba nan, cual ta un bida completamente desordena leu for di felicidad.
Satanas ta un mentiroso, pasobra e ta keda pusha hende den e caminda di orguyo cual ta un caminda di maldad, inmoralidad y separacion for di Dios. Esey ta locual cu e kier logra , pasobra su plan ta pa horta, mata y destrui.
E unico forma cu un hende por sali for di un bida di orguyo y arogancia, ta door di arepenti y entrega su bida completamente na Cristo. Palabra di Dios ta bisa si nos confesa nos pica, Dios ta fiel y husto di pordona nos, nos picanan y libra nos di tur inhusticia.
Ta tempo pa tur hende realisa, cu orguyo no tin nada aden cu por yuda bo crece den Señor, pasobra no lubida cu ta existi orguyo y arogancia spiritual, caminda hende cu conoce Dios keto bay ta comporta nan mes manera pagano of manera mucha chikito discriminando, y treciendo division den e curpa di Cristo.
Di berdad cu Dios no kier tin nada di haber cu orguyo, pasobra pa motibo di orguyo Dios a tira satanas for di cielo, hunto cu un tercera parti di angel cu a wordo contamina cu mesun orguyo.
Orguyo ta daña tur nos relacion cu Dios.
Sinceramente, Pastor Marcel Balootje.
