Franklin Seute ta un yiu di tera cu a bay studia ingenieria na Hulanda, cual el a logra caba cu exito. Actualmente e ta trahando na tera frieu. Algun tempo pasa, el a skirbi e buki ‘Living Rich as a Student in the Netherlands”, cu ta conta tocante finansa personal como studiante na Hulanda. Basicamente e buki ta regarda prijs di vivienda y tur loke e studiante mester sa ora e bin studia na Hulanda.
Franklin ya caba a termina su estudio di ingenieria y e tambe a scoge pa traha na Hulanda. El a conta cu specialmente riba tereno di ingenieria, na Hulanda, bo por crece hopi y den tempo hopi cortico. El a studia mecatronica y na Hulanda vooral, e tin diferente rumbo cu e por scoge.
Pa loke ta un eventual regreso pa su isla natal, sigur un parti interesante, pero pa loke el a studia, e oportunidadnan laboral riba e tereno ey, ta limita. Pero esey no ta nifica cu e lo no kier bay bek. E ta studiando e posibilidadnan pa, den futuro, esey lo por ta factibel pa bay bek.
Un topico cu ta bin hopi dilanti, pa e studiante na final di su estudio, ta si e ta keda Hulanda of e ta prefera di bin bek cas. Pero nan ta wak e mercado laboral, e oportunidad di crece den loke nan a studia, ta hunga un rol hopi grandi na ora di tuma un decision. No ta precisamente e salario, pero mas e crecemento, e oportunidad den crece den loke bo a studia p’e, ta hunga un factor hopi importante.
Asina mes tin hopi studiante cu lo kier bay bek, pa asina contribui den yuda mehora Aruba. Vivienda na Hulanda ta hopi dificil pa haya un luga den un tempo cortico. No ta manera antes mas, bo mester tin un tempo largo inscribi na un asociacion.
Na Aruba, kisas e no ta asina dificil, ya cu si ta posibel pa keda cerca bo mayornan. Pero e ta spera cu e dificultad di haya un luga di biba, no ta asina dificil manera ta e caso na Hulanda.
