Fundacion Mito Croes y fraccion di AVP ta orguyoso di por organisa un simposio masha importante cu e tema. “Cooperacion strategico Aruba-Hulanda 2.0” E simposio lo tuma luga diahuebs awor 25 di april den Grazia Room di Marriott Courtyard Aruba y lo cuminsa pa 7:00pm.
E prome director di TNO Aruba Jan Ebbing, lo ta na Aruba y lo ta e orador principal na e ocasion special aki cu ta asina importante pa Aruba. E simposio tin como meta pa pone e vision optimista y progresivo riba cooperacion strategico entre Aruba y Hulanda riba agenda politico atrobe. E “2.0” den e nomber ta referi na e periodo exitoso di cooperacion entre Aruba y Hulanda entre 2009 y 2017.
Presidente di Fundacion Mito Croes, John Hart, a referi na y accentua e perspectiva prometedor di e periodo bou maneho di partido AVP: “Den e periodo ey a logra hopi den e relacion entre Aruba y Hulanda, entre otro cu atraccion di companianan y institutonan Hulandes di renombre mundial manera TNO, Rietveld Academie, Scheepvaartschool Rotterdam, Philips y Gas Unie. Hasta a logra institui un facultad nobo na Universidad di Aruba den cooperacion cu Universidad di Leuven, Belgica, cu ta completamente dedica na sostenibilidad.”
Hart ta sigui bisa: “Lamentablemente e esfuersonan aki a mengua despues di e periodo ey y casi tur e institutonan Hulandes a bandona Aruba. Como organo di conseho cientifico, Fundacion Mito Croes kier sostene partido AVP pa cuminsa pone di awor caba e base pa reactiva y fortifica e vision aki, pa ora di asumi responsabilidad pa goberna nos pais, por tuma accion mes ora.”
E esfuersonan partido AVP e tempo aya a wordo traduci den un protocol di cooperacion cu Hulanda ya na october 2011. Minister di relacionnan den Reino mr. Piet Hein Donner a informa Tweede Kamer di Hulanda e tempo ey di e vision proactivo di Aruba bisando entre otro: “Hulanda ta dispuesto pa cera relacionnan di cooperacion mas estrecho cu tur e paisnan den Reino. Aruba ta wak posibilidad pa formanan di cooperacion strategico cu Hulanda y cu Union Europeo cu por duna un contribucion esencial na realisacion di e ambicionnan di Aruba y cu por forma cu balor adicional importante pa loke Aruba kier logra riba propio forsa.”
Durante di e simposio e accento lo ta riba identificacion di pasonan concreto cu lo mester tuma pa reactiva e cooperacion entre Aruba y Hulanda, pa asina logra metanan pa ambos pais y pa Reino Hulandes den su totalidad. Un talento hoben di Fundacion Mito Croes,. Aad Jan de Gruijl, lo papia di e oportunidadnan nobo pa empresarionan hoben cu FinTech. E anochi aki tambe lo pone atencion na e necesidad di converti e debe di 900 miyon florin di e fiansa di Hulanda durante di e periodo di Covid, den un fondo di inversion pa sostenibilidad di Aruba.
“Un futuro nobo no ta wordo crea den un par di luna, sigur no si tin mas partido envolvi. Tog ta bunita pa wak, cu ora e partidonan ta desea esaki, por logra resultadonan concreto lihe, manera den e caso di Aruba. Esaki ta priminti hopi pa futuro.” Asina minister Piet Hein Donner a skirbi den su carta na Tweede Kamer na 2011.
E simposio aki ta un oportunidad unico pa esunnan interesa tanto na Aruba como na Hulanda, pa bini hunto, pa intercambia ideanan y pa discuti riba pasonan concreto cu por tuma pa fortifica e cooperacion strategico entre e dos paisnan.
