Abogadonan General Birgit van Roessel y Gerard Sta ta haya cu Wilders a haci su mes culpabel na ofensa contra un grupo y incita odio y discriminacion riba 12 y 19 di maart, 2014.
Corte di Prome Instancia a absolve Wilder di incitacion di odio, y a conden’e solamente pa ofensa contra un grupo y incitacion pa discriminacion. A hay’e culpabel, pero no a impone castigo riba dje.
Abogado General sinembargo ta bisa cu Wilders conscientemente a pone un grupo di e poblacion un banda como di menos importancia, y door di esey conscientemente a tuma e riesgo cu e odio contra e Marocanonan ta lanta den e comunidad. Pa esaki a pidi pa impone un boet di 5 mil florin.
No tin carta blanco
E lider di PVV a scoge pa no solamente papia specificamente di Marocanonan criminal, pa amplia e impacto di su palabranan, segun Van Roessel y Sta. OM ta bisa cu un politico tin basta libertad pa expresa su puntonan di bista , “pero un politico no mag bisa tur cos. E libertad di expresion no ta un carta blanco”. Nan ta bisa cu hustamente un politico tin un responsabilidad mas grandi pa no mina e estado di derecho democratico, y cataloga henter un grupo di e comunidad aki como di menos importancia.”
E splicacion di Wilders cu el a simplemente bisa loke cu tin añas caba para den e programa di partido, no ta un splicacion aceptabel pa OM. Nan ta bisa cu den e programa no tin nada para di Marocanonan. Cu e expresion no ta carga un aprobacion amplio den e partido a keda demostra ora cu despues di e sucedido, diferente miembro di PVV a bandona e partido.
Geert Wilders na final di e sesion a bisa cu e demanda ta “ridiculo” y a cataloga esaki como “increibel y cu riba dje tin un exigencia. Mi ta haya cu mi no mester ta para aki y mester a declarami liber”.
HOPI TEMPO
Segun Wilders, pa hopi aña caba demasiado tempo y placa a wordo dedica na e proceso aki. Tempo y placa cu por a wordo miho uza pa otro cos …. manera busca mas polis.”
E lider di PVV ta keda para’riba cu na 2014 el a simplemente haci un pregunta “cu segun Maurice de Hond un di 42% di e Hulandesnan lo contesta cu un “si”.”
Pero e ta persisti cu e no a bisa nada malo y cu den e entrevistanan el a bisa diferente biaha kico e tabata kiermen cu su expresion: e frontera cera pa e Marocanonan nobo, pero tambe pa otro stranheronan, reemigracion boluntario y deportacion di criminalnan Marocano despues cu kita nacionalidad Hulandes di nan.”
E caso ta sigui dia 3 di september awor, cu defensa di Wilders.
Segun nos por a compronde, e tipo di acusacion aki tambe ta existi den leynan di Aruba. Pero hopi hende no sa di dje of no ta tribi di uz’e pa hiba un politico dilanti mesa berde.
