E ola di calor cu Europa ta sintiendo a bira pio diaranson, cu temperaturanan cu ta yega na 40 grado celsius na Francia, Spaña, Belgica y Hulanda, prome cu yega maximo awe diahuebs atrobe.
Belgica por ehempel a activa pa prome biaha den su historia alerta cora debi e calor na henter e pais, cu excepcion di costa. Ta tuma e medida aki, vigente te cu diabierna, solamente den casonan extremo. Diaranson atardi el a yega 39 grado den centro di e pais, unda autoridadnan a pidi e poblacion tuma e medidanan di precaucion pa evita golpinan di calor, isolacion y deshidratacion.
Diferente departamento of servicio di Gobierno cu ta traha riba caya, a cera pa 1’or di merdia, diaranson, diahuebs y diabierna debi na e calor.
Na zuid di Francia tin alerta oranje diaranson cu temperaturanan yegando 40 grado celsius. Capital di biña, Burdeo, a registra diamars su temperatura record di 41.2 C.
Tanto na Francia como na otro paisnan Europeo, e personanan ta invadi e areanan unda cu tin awa pa refresca nan mes.
Pa awe diahuebs e pronostico ta cu e por yega te na 43 grado celsius na algun pais.
Na Paris nan ta pronostica 41 of 42 pa cual tin un chens grandi cu e ta supera e record di 40.4 cu a keda registra na 1947. Autoridadnan di Francia hasta a pone restriccionnan den uzo di awa na varios departamento di e pais debi na un secura cu a causa un caida drastico di e nivelnan di awa subteraneo y di yobida.
Spaña ta spera temperaturanan maximo di 40 grado celsius na gran parti di e pais.
A Inglatera a dicidi baha velocidad di e treinnan, debi na e condicion di tempo. E calor extremo por haci cu e cablenan den halto por cay. Si e wayanan cay, nan por protege e pasaheronan miho.
Na Hulanda awe diahuebs na Gilze, segun a bisa, tabata e luga mas cayente di Hulanda. A papia cu na algun sitio a midi 41.7 grado, pero un poco despues e instancia encarga cu tempo KNMI a bisa cu esaki no por ta.
E record bieu tabata riba nomber di Eindhoven. Eynan diadomingo a registra 39.3 grado. Poco rato prome na Gilze-Rijen e temperatura tabata 39,2 grado.
E record bieu di Hulanda ta data di 1944: 38.6 grado na Warnsveld.
