Ricardo Rossello diaranson anochi a renuncia su cargo di Gobernador di Puerto rico memey di e “chat gate”.
“Mi ta anuncia cu mi ta renunciando mi puesto di Gobernador, cual lo drenta na vigor dia 2 di augustus, 2019,” el a bisa den un mensahe di video. Persigui pa ola di protesta despues cu a bira conoce combersacionnan di chat unda cu e ta haci comentarionan homofobico, Rossello a informa cu Secretario di Husticia Wanda Vazquez Garced, lo keda encarga cu Gobernacion di forma interino.
Segun Constitucion, e Secretario di Estado ta e prome pa reemplasa e Gobernador pero mirando cu e tambe a renuncia, e cargo ta keda e ora pa Vazquez Garced.
Den un comunicado oficial, e Secretario di Husticia a declara cu ‘ora e renuncia bira realidad, si e ta necesario, mi lo asumi e tarea historico cu Constitucion di Estado Liber Asocia di Puerto Rico y e leynan aplicabel ta impone riba nos”.
Rossello a bira asina e prome Gobernador di Puerto Rico cu ta renuncia memey di su mandato.
E miles di manifestantenan cu tabata pafo di e Fortaleza, e residencia oficial, a bula di alegria ora cu e Gobernador a confirma su salida gritando “Ricky te botamos”. Esaki pasobra Rossello ta baha despues di mas di diesun dia di protestanan intenso den cual a participa miles di Puertorriqueño cu a aglomera bou di e lema “Ricky, renuncia”. E marchanan tabata encabesa pa algun di e artistanan mas prominente di e isla, manera Residente of Ricky Martin.
E protesta a bira un celebracion cu e anuncia di e dimision di Gobernador.
E crisis a sirbi despues di e publicacion di un cadena largo di mensahenan priva intercambia riba e plataforma Telegram, den cual Rossello y su grupo cerca di colaboradornan tabata haci comentarionan homofobico y insultante riba contrincantenan politico, cantante of periodistanan.
Tambe e tabata inclui al menos un comentario haciendo bofon di e victimanan di horcan Maria cu a causa hopi daño na Puerto na 2017 y a laga mas di 4.000 victima, segun un estudio di Universidad di Harvard.
E documento ta contene casi 900 pagina di mensahenan filtra pa “Centro de Periodismo Investigativo” (CPI), cu a ricibi e documento completo di parti di un fuente anonimo.
E mensahenan ta cuminsa na december di 2018 y te yega te final di januari, 2019.
