Diabierna mainta Oficina di Turismo di Aruba a recorda e di 10 aniversario di e programa di certificacion. Entre invitadonan tawatin companianan cu ta completamente certifica. Durante e mainta aki tambe a lansa e asina yama ACP ‘on demand’. Desde su inicio na 2011, ATA a sostene e programa di certificacion esta “mi compromiso”, na unda cu diferente miembronan di ekipo di ATA tawata instrumental den e desaroyo di dicho programa.
E enfoke di e programa ta pa stimula un nivel di servicio di balor halto y ta brinda e consumidor e dicho “balor pa nan placa” na locual nan ta paga pa vacacion na Aruba. Ta asina cu na aña 2011, alrededor di 214 persona a certifica nan mes y aña pasa e cantidad di 1414 persona a wordo certifica, cual tawata e aña record desde e inicio di e programa aki.
Na 2018 ATA a establece e fundacion independiente pa carga e Aruba Certification Program, esta Aruba Excellence Foundation (AEF), kende a bin ta haci un tremendo trabou. ATA ta felicita e ekipo di AEF y su directora Esther Broeksema como tambe e hunta di maneho, cu ta consisti di ATA, AHATA, Gobierno di Aruba y Universidad di Aruba. ATA ta para tambe tras di evolucion di e entrenamento durante añanan unda a introduci diferente programanan pa mucha, ACP online, curso pa managers, workshops y mas.
ACP ‘on demand’ ta nifica cu e programa di ACP ta accesibel na cualkier persona y na cualkier momento dentro di un periodo stipula via su plataforma digital y e ta completamente gratis. E meta cu Aruba Excellence conhuntamente cu ATA pa e aña aki ta pa certifica entre 1500 y 1700 persona, cual nos ta sigur cu e ACP ‘on demand’ lo por contribui pa haci esaki bira un realidad. Tambe tin como meta pa haci e ACP un aspecto obligatorio pa entre otro esnan cu mester renoba permiso, of habri un negoshi nobo. Pa esaki dialogo cu Gobierno mester continua.
ATA lo sigui sostene Aruba Excellence Foundation y ta gradici tur esnan cu a certifica nan mes te cu awor y mas cu claro tur e negoshinan cu a deposita nan confiansa den e programa di ACP. Por ultimo, ATA kier duna un danki y un pabien special na tur e companianan cu tawata presente na e lansamento oficial di ACP ‘on demand’ kende nan empleadonan ta 100% certifica.
