Alvin Molina (MEP) ta sostene hazaña pa yega na un museo di antiguedad

Diasabra ultimo pa exactamente 5:00 pm e conocido Heintje Ras a cuminsa cu su hazaña y a drenta asina e mina di fosfaat na Sero Colorado. Heintje lo keda 100 dia den e mina. Esaki ta nifica 100 dia sin claridad natural, sin e comodidadnan diario manera airco, internet y cama. 

Heintje a cuminsa cu a hazaña aki danki na un vision cu e tin pa traha un mega museo di antiguedad na unda nos tur y nos turistanan lo por disfruta di mas cu 6000 artefacto cu ya caba Heintje tin den su coleccion. “Den mi opinion esaki ta algo hopi importante y sigur bunita pa logra mirando cu di e forma aki nos por preserva un gran parti di nos historia y cultura. Na banda di esaki, nos ta na altura cu mundo henter ta pasando den situacion financiero dificil unda cu na e momentonan aki Gobierno di Aruba no tin e fondonan necesario pa por aporta na e mega museo cu ta e deseo di Heintje Ras. Pa e motibo aki tambe Heintje a dicidi pa a pesar di e situacion aki e mes kier recauda fondo pa su mega museo por medio di e hazaña aki”, di acuerdo cu parlamentario Alvin Molina

Ta di admira con Heintje a y ta uni un pueblo pa lucha pa un vision cu ta yuda nos preserva nos historia y cultura. Berdad cu mundo ta den crisis, pero nos por logra hopi cos na momento cu nos ta dicidi di traha hunto y lucha pa un solo meta. “Mi mes ta desea di haci uzo di e ehempel aki pa hiba esaki den mi trabou diario como parlamentario unda mi lo desea pa di e mesun forma cu Heintje a uni un pueblo, cu nos por uni tambe den Parlamento pa traha semper na bienestar di nos pais. E siman aki lo sigui reuni tocante e comisionnan fiho. E comisionnan aki ta brinda nos e oportunidad como parlamentario pa no solamente controla, critica pero tambe pa di un manera proactive nos aporta na e maneho y desicionnan di Gobierno”, asina parlamentario Alvin Molina a duna di conoce. 

“Mi ta invita tur hende pa bishita e facebook page hazaña mega museo pa sigui e acto historico aki di cerca y sigur pa like, share, comment y contribui segun por”.