“E ta legalmente corecto, pero moralmente cuestionabel”, asina un bisiña para pafo di e cas na Saliña Cerca a bisa awe. Notario mr. Ralph Yarzagaray, despues di un disputa legal di hopi aña cu su ex señora, a logra awe pa haya permiso di Hues pa sak’e di cas, hunto cu nan yiu muhe menor di edad, y pone nan tur riba caya!
Deurwaarder Wix a yega cu Polis na e cas awe mainta cu un batayon di ayudante pa saca tur mueble y pertenencia for di e cas. Un mama di 4 yiu a keda desampara riba caya cu tur su cosnan, pensando con e lo pasa anochi awo. E no por caba di compronde kico e Notario tin den su cabes, tur luna ta paga alimentacion lat na Voogdijraad, a purba bende e cas na findishi dos biaha caba, cu su yiu aden! A hunga weganan legal pa manda nan di dos cas bende na findishi pa e mes bira cumpre barata via un otro compania di dje. Ta practicanan cu kisas ta legal pero cu moralmente y eticamente ta hopi condenabel!
E señora a conoce e Notario como 20 aña pasa y a start un relacion amoroso. For di e amor a nace un yiu muhe cu awor tin 16 aña di edad. Yarzagaray a topa su pareha cu su mesun cas caba pero a logra pa e señora a pasa mita di e cas pe, cu un documento cu e lo a paga 75 mil florin pe, cu te dia di awe e no a paga tampoco.
Pa colmo e señora tabata y a keda traha te awe cu e Notario. Despues di separacion, e señora ta bisa, el a keda paga huur te cu luna pasa. Tin un decision di Corte di Hof cu ta bisa cu e Notario mester pag’e un suma di placa, mas o menos 275 mi florin, pero no a of no kier a haci esaki ainda. E señora a splica cu e ta sperando pa haya su placa.
Mientras cu e hecho ta tumando luga, el a yama su abogado mr. Boyce pa pone na altura. E Deurwaarder a presenta cu dos decision di caso sumario cu nan a apela caba, pero asina mes a dicidi cu mester saca nan for di e cas. Segun e Abogado, e señora no debe huur. Al contrario su ex pareha debe placa.
