Aunke cuanto maldad por avansa riba e mundo aki, aunke cuanto hende kier rebeldia y resisti e bondad di Dios, e Gloria di Dios ta manifesta tur dia riba e mundo aki. Dicon esey ta sosode? Pasobra nos Dios ta: Nos Tata, esun berdadero,
omnipotente, soberano, Dios di compasion, Dios di misericordia, defensor, sanador, proveedor, salbador, creador. E ta glorioso.
Kico ta nifica gloria? Awel gloria ta nifica e distincion mas halto cu nos por duna solamente na Dios. Y Dios no ta comparti su gloria cu ningun hende, cu ningun imagen, nada traha cu man di hende no por carga e gloria y presencia di Dios.
P’esey hende mester tene bon cuenta na kico nan ta ofrece alabansa y adoracion. Pasobra solamente Dios merece tur honor y gloria. Ciencia por aumenta, tecnologia por avansa, pero nada por reemplasa e gloria di Dios. E mundo ta yen di e gloria di Dios.
Cada mainta ora nos lanta for di nos cama, nos por mira e expresion di e gloria di Dios den nos tur cos. Hopi ta esunnan cu e enemigo a bruha nan mente, pa nan no alaba y glorifica e nomber di nos Señor. Nan ta mara den scuridad y no ta realisando kico nan ta perde, pasobra tur cos ta depende con nos ta biba awe pa asina nos mira e gloria di Dios mañan cu Dios kier.
Boso anto stima nan, sabiendo esaki di antemano, tene cuidao, pa boso no ta lastra hiba pa medio di e eror di homber malvado y boso cay for di boso mes firmesa. Ma crece den e gracia y conocemento di nos Señor y Salbador Hesus Cristo. Na E sea e gloria awor y te na e dia di eternidad, Amen (2 Pedro 3:18).
E mundo ta yen di e gloria di Dios, scuridad no por vence claridad. Pasobra claridad ta bini di Dios, y den nomber di Cristo Hesus, nos lo vence tur trampa di e enemigo.
Den tur hogar e gloria di Dios mester manifesta, pasobra tur rudia mester dobla y tur lenga mester confesa cu Hesus Cristo ta Señor.
Pa tur esunnan cu ta kere Dios ta precioso, pero pa esunnan cu no ta kere, esunnan cu ta haci bofon. Esunnan cu ta chercha, esunnan cu ta rebeldia, esunnan cu kier dividi Su creacion pa nan e ta un piedra di trompica pasobra ta para skirbi: E piedra cu e trahadonan a rechasa, esaki a bira e piedra di skina principal. Un piedra di trompica y un piedra di ofensa.
Asina awor hopi hende ta bisando ora bo coregi of bisa nan e berdad, pa bo no husga nan. Pero no ta abo como persona ta husga ningun hende, pero e palabra di Dios ta primi consenshi di tur esunnan cu ta den desobediencia, cu mirando e grandesa di Dios y no kier acepta e berdad.
No na nos O Señor, no na nos, ma na bo nomber tur e gloria pa motibo di bo misericordia y pa motibo di bo berdad (Salmo 115:1). P’esey cada dia den nos bida, nos mester mengua pa asina Dios por crece den nos bida, pasobra orguyo y arogancia, rabia, envidia y amargura. Tur lo stroba hende di mira e gloria di Dios.
Pasobra di dj’E y door di dj’E tur cos ta. Na E sea gloria pa semper (Romanonan 11:36).
Dios ta E creador di tur cos. E diabel nunca a crea nada y tampoco lo crea nada. E ta uza mente y curpa di esunnan cu te ainda ta resisti e berdad di Dios. E ta pone nan haci maldad na nan mesun curpa y na otro. Na Dios tur e gloria.
Sinceramente,
Pastoor Marcel Balootje.
