Dialuna anochi Minister di Turismo y Salud Publico, Dangui Oduber, tabata na Papiamento Restaurant pa honra dos famia cu ta bishitando Aruba loyalmente cu un reconocimento di embahador di bon buluntad den presencia di nan famia.
E reconocimento aki di “The Goodwill Ambassador” semper ta keda presenta pa e Minister di Turismo como un toke di aprecio na turistanab cu a bishita Aruba pa 40 aña of mas consecutivamente.
E honradonan reconoci como e embahadornan di bon boluntad a bay pa Holly & Demi Thoman y pa Beth & George Schlageter. Ambos famia ta bishitando nos isla consecutivamente pa mas di 45 aña.
E dos famianan aki a conoce otro na momento cu nan mayornan a cumpra timeshare na final di añanan ‘70 na Aruba Beach Club. Nan yuinan tambe ta bin Aruba tur aña hunto cu e nietonan. Tur dos famia tin 4 generacion (bisa-welo, welo, yiu, nieto) di nan famia cu ta bishitando nos isla tur aña. Un bunita amistad familiar cu e dos famianan aki a forma riba nos isla.
E famianan a menciona cu nan ta stima nos isla masha hopi mes, especialmente pa nos solo cu ta briya henter aña, nos beachnan blanco, nos gastronomia, e seguridad y nos hendenan caluroso y amabel.
Minister Dangui Oduber tabata encanta pa por a presenta e plakkaat aki na famia Thoman y Schlageter hunto cu algun regalo den presencia di demas famia. Asina a yama nan danki pa a scoge Aruba como nan destinacion faborito y nan cas leu fo’i cas pa mas di cuater decada.
