Diamars marduga pa mas of menos 5:00 am, a drenta notificacion cu algun persona lo a drenta warda di polis na Balashi y e horta un cantidad di brommer. A logra detene tres hende homber relaciona cu esaki y tambe a logra confisca e brommernan aki bek. Ainda ta investigando e suceso pa mira si tabatin mas hende envolvi. Tambe lo bay haci un inventario pa mira si lo por a bay cu mas vehiculo for di e warda. 24ora.com acudi na warda di Balashi pa asina ricibi un ‘follow-up’ di e caso aki.
Den cuadro di esaki, Rasmijn a splica cu di cual e por compronde, nan tin wowo tur caminda na e warda pero cu esaki ta cay mas bou informacion di leiding, mucho mas informacion tocante esaki no tin actualmente. Ta di nota si cu e warda ta yena cu un cantidad di diferente tipo di vehiculo di transporte, riba cual Rasmijn a bisa cu sa pasa cu ta yega dado momento cu no tin mas luga pa pone mas vehiculo. Pa e situacion aki, nan sa haci un ‘semi-limpiesa’ pa asina traha mas luga.
Situacion di siguridad na Balashi
Pa loke ta e situacion di siguridad, den e caso di hortamento aki, a logra gara e personanan envolvi. Sinembargo, no tin un personal di siguridad ta cuida propiedad di pueblo cu ta confisca na e warda aki. Ley ta stipula cu unabes polis confisca un vehiculo, gobierno ta bira responsabel pa esaki. E warda ta habri for di 8:00 am te cu 4:00 pm. Antes tabatin miembro di CEA pa cuida tur loke ta staciona na e warda aki, pero pa basta tempo caba esaki no ta e caso mas. Tur esaki pa motibo cu no kier paga ‘over-time’, pero si tin un trahado di CEA ta cuida un helicopter na localidad di Brandweer. Gobierno tin un deber pa cuida locual polis ta kita di e pueblo y ta spera cu por bin cu un solucion pronto pa esaki.
Rasmijn kier recorda pueblo di Aruba tambe cu si por tin cualkier informacion tocante e suceso di diamars marduga, si cualkier persona por a mira algo, pa por fabor yama e ‘tiplijn’ di polis na 11141 pa asina yuda cu e investigacion di e caso.
