Ciudadano a pidi presencia di polis na Barcadera pa un caso di ladronicia caminda el a logra localisa e sospechoso. A topa cu e auto cu a describi e anochi anterior, despues di e destruccion.
Diadomingo mainta, den careda di 11:00 am, un victima di kiebro y ladronicia a cuminsa su propio investigacion y a bin topa cu e auto y persona sospechoso di e acto aki den area di Barccadera, net un poco mas pabou di Payless Car Rental.
Segun a indica, e anochi prome (diasabra anochi) un antisocial a pasa kibra un gran cantidad di vehiculo den area di Savaneta, banda di Santana y Piscina Olimpico. Entre tur, tabatin su vehiculo, cu nan a kibra aden y bay cu algun pertenencia. A duna di conoce cu lo tabata trata di un sospechoso den un Nissan march color oranje cu lo tabata responsible pa e acto aki.
Na yegada, polis a tuma declaracion di e sospechoso na sitio como tambe di e victima, cu ta sigura di tin e persona corecto. Asina mes no a detene ningun hende e memento ey. Tin cu laga investigacion determina, cu prueba, cu ta trata di e persona aki en cuestion.
E victima, naturalmente disgusta, no tabata contento pero a splica cu e ta testigo cu e persona aki ta e antisocial cu a kibra/ horta den su vehiculo. Ta laga esaki den man di recherche cu tin cu saca afo y presenta cu prueba pa asina yega na un detencion. Mientrastanto e persona aki ta un sospechoso pero den libertad.
