Diasabra a tuma luga un encuentro di cabayero di Iglesia Pentecosta di Aruba, cual encuentro a tuma luga den edificio di Ibero American High School na San Nicolas.
Un di esunnan presente e anochi aki tabata Raynaldo Jones, cu a conta su testimonio di bida. El a splica cu e tabata un persona cu tabata lucha contra di su adiccion y esaki tabata haci cu e tabata mas paden di KIA cu pafo.
Su bida a bira asina dificil, cu e tabata kier a kita su bida, unda cu el a overdose tres biaha. Tempo cu e tabata den prizon, un misionero di Iglesia Aliansa Nobo, cu tabata duna les na e presonan. Door di e persona aki el a conoce un rehab centre, Aliansa Nobo.
Na su salida di prizon, e intencion tabata ta pa el a bay Centro Colorado, pero esaki no a bay door pa motibo di Covid. E no a laga esaki strob’e di busca ayudo pa cual el a bay e centro di rehabilitacion di Aliansa Nobo.
Aki nan ta duna les di rehabilitacion pa medio di bijbel. Segun Jones, aki el a reconoce cual ta su proposito den bida y aki el a dicidi di acepta Hesucristo como su Señor y Salbador.
Mas aleu, Jones a sigui bisa cu na final di su rehabilitacion, el a dicidi di keda na Aliansa Nobo como ayudante boluntario. Loke ta haci eynan ta di duna testimonio pa yuda, cu pa medio di e palabra ta siña. Pa ricibi gracia, mester duna gracia.
Jones ta sumamente encanta pa sirbi Dios. E ta sinti cu e tin un obligacion pa duna bek pa locual el a haya. Y e ta purba di yuda otro pa no comete e mesun eror cu e a comete den su bida.
Por ultimo, el a gradici un y tur cu a yud’e den su trayecto pa e por a siña conoce di Dios y su unico yiu Hesucristo cu pa medio di dje nos tur ta salba.
