Diabierna y diasabra lo ta dos dia grandi p’e amantenan di Caiso & Soca, ya cu esaki t’e dos dianan final pa asina conoce nos Caiso & Soca King 2024.
Banda ‘NFuzion lo ta e prome banda pa diabierna cu ta e anochi di Groovy Soca & Caiso. Diahuebs anochi e banda a bin hunto un biaha mas den un ultimo traning, p’asina ‘fine tune’, ‘polish’ y pone e ultimo tokenan den nan preparacion pa e weekend grandi aki.
PRESION
Lider di e banda, Ofo Escudero a indica cu semper bo ta sinti un poco di presion ora cu ta toca bo na subi como e prome banda di anochi, ya cu semper e banda kier haya un number den e ora piek, cu ta entre 11:00pm pa 1:00am, unda cu tur hende ta mas ‘engaged’ cu e bandanan. Despues di 11:00pm ta e ora unda cu e massa ta yega y ta canta y baila hunto cu e cantantenan.
Aunke cu e huradonan ta bisa cu nan no ta worry cu esey, segun Ofo, e ta funciona si! Pero asina mes ‘NFuzion kier pone un standard como prome banda pa e ora esunnan cu ta sigui, pa catch up.
Pa loke ta e canticanan cu nan a competi cu ne, nan a clasifica cu shete y nan ta contento cu ne. Unico cu a keda afo tabata esun di Lerod Escudero y awo el a cuminsa zona tambe riba caminda.
Pero, awo e lo bin cu su videoclip tambe. ‘NFuzion ta kere den su canticanan y ta traha duro pa nan. Clasifica of no clasifica, ta toca tur durante e paradanan.
Por ultimo, Ofo a haci un apelacion na e fanaticonan di e banda pa nan yega trempan, ya cu nan lo ta e prome banda pa subi escenario e diabierna aki.
