Departamento di Impuesto no a para kedo durante di e periodo cu tabatin tras di lomba. A traha hopi duro riba nan proyectonan di digitalisacion, caminda cu a sigui cu e proyectonan aki y a digitalisa mayoria di e formularionan. Director mr. Luenne Gomez-Pieters a indica cu aña pasa a anuncia nan portal digital, caminda comerciante of contribuyente cu tin actividad economico, por entrega nan formulario di impuesto na un manera digital. E portal yama Bo Impuesto.
Actualmente tin 7.505 compania of contribuyente cu tin actividad economico registra riba e portal. E portal aki ta specificamente pa entrega di formulario di impuesto mensual, manera loonbelasting, BBO, Toeristenheffing, bijzonderbelasting verblijf, speelvergunningsrecht, cual ta pa e casinonan y tambe e verzamelloonstaat entre otro.
Tur negoshi cu tin un actividad economico, mester registra nan mes, pasobra entrante luna di juli DIMP no lo otorga ningun formulario mas riba papel. Esaki ta importante pa menciona. E contribuyentenan of negoshinan cu no ta registra ainda, tin e chens pa haci esaki via di e website.
Tin un sistema tambe di cita. Nan por manda un email tambe, si esaki nan ta desea na [email protected] of por yama na 5227437. Esaki ta e liñanan di comunicacion pa registracion di negoshi. Ta importante pa negoshinan sa cu DIMP no lo otorga ningun formulario mas riba papel y tampoco no lo bay otorga un duplicado di luna di januari, februari of maart, e lunanan cu a pasa caba. Ta urgi tur comerciante pa haci esaki mas pronto posibel pa asina ey tambe nan por cumpli cu nan debernan di impuesto.
Ta importante pa menciona cu una bes cu e compania ta registra riba e portal, lo haya un propio username y password. No comparti bo username ni bo paswoord cu ningun otro hende. E director of e doño di e negoshi ta esun cu ta haya su username y paswoord. E por asigna of e por duna autorisacion na su asesor fiscal, cu ta un belastingadviseur of un administratiekantoor den e sistema, por dun’e e autorisacion pa e por yena su formulario di impuesto p’e.
E asesor fiscal mes, como negoshi, tambe mester ta registra den e sistema di DIMP y tambe tin su mesun username of su paswoord. Por mira y tende algun señal cu esaki ta pasando y kier a pone contribuyentenan, mira e importancia cu un username y paswoord ta algo personal. No comparti esaki, mescos cu pincode di bo credit card of bo debitcard. Esaki ta pa bo uzo den e sistema digital di DIMP.
Pago di impuesto si ainda lo no por sosode via e portal. Ta trahando hopi duro si riba esaki. Hunto cu banconan comercial y pronto lo por keda cla pa den un solo rosea, ora e contribuyente entrega su formulario di impuesto mensual, e contribuyente of negoshante, por haci pago via e mesun portal di departamento di Impuesto.
Ta un servicio cu ta trahando extra riba dje. Pero pago actualmente por sosode online. Na tur MFA por paga cu debitcard y na Camacuri por paga cu debitcard y cash. Tin solamente dos loket cu ta activo awor aki pa pagonan cash di impuesto.
Si bo no a registra ainda y tin un cita mas despues di 15 di augustus, no ta problema tampoco. A traha den e portal, unda cu por ubica esnan cu por entrega un biaha nan formulario y traha nan cita pa nan por registra nan compania.
