Un taxi pirata ta un persona cu ta uza su auto pa transporta pasahero di un punta pa otro, a cambio di pago, sin cu e tin permiso pa haci esey. Dor cu e no ta un taxista, e no tin e seguro necesario pa cubri e gastonan di e pasahero den un accidente. Tampoco e pasahero no sa si e papelnan di e auto ta na ordo, manera seguro paga, impuesto paga of si e vehiculo ta gekeur.
Rib’e video por mira con un auto marca Suzuki modelo Baleno numera, A-65295 para den e parkinglot di Postkantoor na Playa, ta piki pasahero den pleno dia. Den combersacion cu director di DTP, Theo Kock, a conta cu nan no tin derecho di para ningun taxi pirata sin mas, ta keda na polis pa haci esey. Tres dia pasa a cuminsa un proyecto piloto entre KPA y DTP pa cuminsa kit’e vehiculonan ‘ki for di caretera. Nos ta pendiente pa un entrevista cu e director di DTP y of cu KPA.
E fenomeno di taxi pirata a bira un trend e ultimo temponan aki. Mientras cu chauffeurnan di autobus mester paga tur tipo di impuesto y seguro, taxi pirata ta traha sin paga nada. Den combersacion cu varios chauffeur di autobus, a conta cu e piratanan ta asina sin gevoel y sin cuer’i cara, door di bay asina leu di hasta piki pasahero nan dilanti.
E siman ‘ki a nota cu Departamento di Transporte Publico (DTP) hunto cu polis a cuminsa actua contra di esaki. Ayera den oranan di mainta polis a capta un taxi pirata cu auto yen di pasahero, a kit’e auto fo’i dje y tur hende a keda na pia.
