Den cuadro di e Campeonato Mundial di Futbol, FIFA mes ta organisa afterparties grandisimo den diferente ciudad anfitrion, y e asina yama FIFA Fan Festival na Houston a resulta di ta un exito rotundo. Durante e dianan tras di lomba, un total di 15 mil persona a bishita e luga pa disfruta di e ambiente deportivo. Ya caba for di diahuebs, pero specialmente diasabra, e sitio a yena por completo. E cantidad di hende tabata asina grandi cu na dado momento e organisacion mester a stop di laga hende drenta, wardando pa algun shen persona sali prome cu por a bolbe habri e portanan principal.
E festival tabata ofrece diferente actividad p’e fanaticada. E sitio tabatin dos arena grandi cu pantayanan gigante unda cu e bishitantenan por a mira e wega entre Brazil y Maroco, banda di otro atraccionnan, manera e shop oficial di FIFA unda por a cumpra mercancia original. Varios sponsor renombra, manera Coca Cola y Bank of America, tabatin nan areanan special den e layout pa asina drenta den contacto directo cu nan clientenan y e publico general.
Un di e desafionan mas grandi di e dianan aki tabata e clima, mirando cu tabata haci sumamente calor. P’e motibo aki, e cuerpo di brandweer tabat’ey presente pa basha awa basta biaha y refresca e luga. Mirando e importancia pa hende keda hidrata den e tipo di eventonan aki, e organisacion a parti rond saconan di ijs p’e personanan por a combati e temperatura halto.
E ambiente a conta cu un fuerte presencia Antiano, ya cu tabatin hopi hende di Aruba y Corsou canando rond, preparando y biniendo den ambiente p’e wega di diadomingo (awe). Pa cera e fin di siman cu un gran ambiente musical, diasabra anochi nos orguyo nacional y internacional Jeon a presenta eynan, dunando un show cu a lanta e entusiasmo di tur e presentenan.
