Lee R. Raymond, ex presidente y CEO di ExxonMobil, a fayece dia 6 di juni 2026 na Dallas na e edad di 87 aña. Raymond tabata un di e ehecutivonan di petroleo mas influyente di su epoca.
E ta conoci pa a negocia e fusion entre Exxon y Mobil na 1999. Converti Exxon den un di e companianan mas rendabel na mundo. El a sirbi despues como Director Independiente Principal di JPMorgan Chase.
Su posicion publico skeptico tocante regulacion relaciona cu cambio climatico, un tema cu a keda controversial hopi aña despues di su retiro.
Conexion di Lee Raymond cu Aruba
Lee Raymond tabatin un relacion importante cu Aruba den e prome parti di su carera cu Exxon. Despues di uni cu Exxon na aña 1963 como ingeniero kimico, el a ocupa varios puesto tecnico y gerencial tanto na Merca como den exterior.
Durante final di e añanan 1960 y principio di e añanan 1970, el a traha na Aruba, unda Exxon tabata opera refineria Lago na San Nicolas pa medio di su subsidiario Lago Oil & Transport Company.
Lago tabata un di e refinerianan mas grandi y mas importante na mundo durante gran parti di siglo 20. E tabata procesa petroleo crudo principalmente for di Venezuela y a hunga un rol strategico hopi importante durante Segunda Guerra Mundial y den e periodonan despues di guera.
Trahando na Lago a duna hoben gerentenan di Exxon experiencia valioso den operacionnan internacional di refinacion na gran escala. Aruba a bira un berdadero centro di entrenamiento pa hopi ehecutivo cu despues a yega na posicionnan hopi halto den Exxon.
E experiencia cu Raymond a gana na Aruba tabata parti di e base internacional cu a yud’é subi den e organisacion. Despues el a ocupa varios puesto importante den refinacion, industria kimico y administracion corporativo prome cu bira presidente di Exxon Corporation na 1987. Despues Presidente di Directiva y CEO di Exxon na aña 1993. Y finalmente Presidente di Directiva y CEO di ExxonMobil despues di e fusion cu Mobil na aña 1999.
Pa hopi hende na Aruba, Lago no tabata solamente un instalacion industrial. E tabata tambe un institucion social cu su propio casnan, scolnan, clubnan, hospital y programa recreativo. Pa hopi empleadonan di afor di Exxon, incluyendo futuro ehecutivonan, Aruba tabata un capitulo hopi importante den nan desaroyo profesional.
Historia di Lago Aruba
Lago Oil & Transport Company ta un di e capitulonan di mas importante den historia moderno di Aruba. Sin Lago, Aruba probablemente no lo tabata e pais cu nos conoce awe.
Na aña 1924, Lago Oil & Transport Company a wordo estableci inicialmente como un compania di transporte pa move petroleo crudo for di Lago Maracaibo na Venezuela pa Aruba. A scoge San Nicolas pa motibo di su waf, cercania cu Venezuela y espacio disponibel pa expansion.
Na aña 1928 construccion di e refineria a cuminsa. Pa 1 di januari 1929 e prome unidadnan di refinacion tabata operando. Na final di e mesun aña, e capacidad ya tabata cerca 100.000 bari pa dia.
Standard Oil (cu despues a bira Exxon) a asumi control di Lago. E refineria a sigui crece rapidamente te ora cu a bira un di e refinerianan di mas grandi na mundo. Miles di trahadornan for di Aruba, Caribe, Surnam, Guyana, Venezuela y otro paisnan a bin biba y traha na San Nicolas.
Ta considera e epoca entre aña 1950 y 1960 como e “Golden Years” di Lago. Mas cu 10.000 persona tabata traha directo of indirectamente pa Lago. San Nicolas a bira e ciudad mas dinamico di Aruba. Negoshinan, musica, deporte y cultura a florece. Aruba a disfruta di un prosperidad economico sin precedente.
Pero na 1970 a cuminsa nota cambio y caida den e negoshi. Cambio den mercado mundial di petroleo, automatisacion y costonan operacional mas halto a pone presion riba e refineria. Exxon finalmente a anuncia e clausura.
Dia 31 di maart 1985 Lago oficialmente a cera su portanan. E evento aki a causa un golpi economico grandi pa Aruba.
Despues di aña 1985 cu e refineria a cera, Coastal Corporation a percura pa reapertura di un parti di e refineria. Valero despues a tuma posesion. Citgo tambe a medio opera e planta durante un periodo masha cortico. Varios intento di reactivacion a tuma luga, pero nunca mas e refineria a yega na e importancia cu e tabatin durante e tempo di Lago.
Pa hopi Arubiano,specialmente den San Nicolas; Lago no tabata simplemente un trabou. Lago tabata un forma di bida.
