Cobertura di Mundial 2026 ta sigui na Houston, caminda nos director di 24ora.com, Mark Benson, ta presente pa reporta riba e preparacionnan y e ambiente rond di e tan spera wega entre Corsou y Alemania.
E stadion, conoci originalmente como NRG Stadium, a keda temporalmente referi como “Houston Stadium” den contexto di FIFA, debi na regla di no uza sponsor comercial den nomber oficial durante mundial.
NRG Stadium normalmente ta un veld di futbol Americano, pero pa mundial a pasa door di un transformacion completo. E yerba special treci for di Colorado, mientras sistema di luz artificial cu nan a trece di Hulanda ta instala pa sigura cu e yerba ta crece y ta cla pa competencia.
Ademas, e dak di e stadion mester keda cera durante e wega pa controla e calor extremo cu atualmente ta haci na Houston. E cambionan ta haci tambe den area di vestuario, acceso di ekipo, unda tur ta adapta cu identidad di cada pais participante, cual a keda hopi bunita.
E capacidad di stadion normalmente ta entre 72 mil y 80 mil persona pa evento grandi, pero pa FIFA 2026 a ahusta esaki pa aproximadamente 68 mil persona disponibel, cumpliendo e regulacionnan di siguridad y comodidad.
Mientras tanto, e ambiente di e carchinan di entrada den e ultimo lunanan a baha y subi. Ainda a reporta cu algun ticket ta disponibel rond di 400 dollar, mientras cu prijs premium por yega entre 10 mil y 15 mil dollar, dependiendo di ubicacion. Mercado di re-sale tambe ta activo, cu e personanan cu ta bende nan entrada despues di a cumpra nan inicialmente, sea door cu nan no por bay of pa inverti.
Den e stadion mes, trabounan ta continua intensamente. Forklift, tecniconan y personal logistico ta traha duro pa termina preparacion final pa apertura. E obhetivo ta pa tin tur cos cla pa ricibi miles di fanatico p’e prome wega oficial den stadion pa temporada mundia diadomingo.
Segun informacion di e organisacion, Houston lo tin un total di shete partido durante mundial 2026, incluyendo encuentro den fase di grupo y eliminacion directo. Entre nan ta cinco partido di grupo y dos partido adicional di etapa final.
Cu e preparacionnan casi cla, Houston ta posiciona su mes como un di e epicentronan mas importante di mundial 2026 na Merca.
Cobertura di Mundial 2026 ta presenta pa:
RDA
Taco Bell
Arugas
Old Parr
Frito Lay
Que Pasa Restaurant
Cafe the Plaza
Balashi
Elmar
SVB
Fast
Setar
RIU
AIB Bank
Banco di Caribe
