E artistanan Nahliel, Miguelxx y Rebel a yega Aruba hopi contento cu resultado di un gira di trabou cu nan a haci pa Medellin, Colombia pa promove nan produccion “Trilogia Salas”.
E biahe’ki por wordo considera un tour promocional, pasando na diferente radio-emisora y canalnan di television. “E tabata un gira completamente exitoso, unda a promove e musica urbano produci pa nos aki na Aruba.”
E grupo ta consisti di dos hoben cu a nace na Aruba, mientras cu e di tres integrante a nace na Colombia, pero a pasa su bida entre Cartagena y Aruba. Tur tres ta stima musica, mas musica urbano. Despues di a traha pa un periodo riba “Trilogia Salas”, nan a dicidi di haci un intento di pone e produccion riba mercado internacional, cuminsando na Colombia. “Loke nos a logra, nos no a spera, pero a sinti algo pasobra nos a traha duro pa nos soñonan bira realidad. Pa hiba e musica mas leu cu e mercado di Aruba,” Rebel a bisa.
E tres hobennan aki ta traha riba nan mes, pero pa e produccion aki a dicidi di uni nan talentonan cu e intencion pa esaki pasa fronteranan di Aruba.
Nan siguiente paso ta pa haci e siguiente paso ta pa biaha un bes mas pa Colombia pa sigui pusha y hiba nan musica y e nomber di Aruba den e ramo aki na otro nivel, internacionalmente.
