Despues di nan bishita cortico pero intensivo na Aruba, Su Mahestad, Rey Willem Alexander, Su Mahestad, Reina Maxima y Su Altesa Real, Prinses Amalia a sigui rumbo pa Corsou cu boto di Marina Real. Na nan despedida, Prome Minister mr. Evelyn Wever-Croes, den nomber di Gobierno di Aruba y den nomber di tur ciudadano, a gradici Famia Real pa nan bishita na Aruba.
Famia Real tambe a expresa cu nan ta hopi contento, satisfecho y agradeci pa e ricibimento cu nan a haya di pueblo di Aruba. Mientras nan tanata duna otro man pa despedi, SM Rey Willem Alexander a gradici Prome Minister hopi mes y alabes a pidi Prome Minister pa pasa su gratitud na Conseho di Minister y tambe na henter e pueblo di Aruba pa ricibie, su señora y nan yiu muhe, SAR Prinses Amalia, cu un caluroso bonbini.
SM Rey Willem Alexander y su famia a sinti nan mes hopi na cas y nan a sinti tambe cu tin un stimacion y aprecio grandi pa Famia Real na Aruba y ta aprecia e forma cu Aruba a ricibi nan. Tambe nan a aprecia di mira cu nos hendenan, no solamente tin aprecio pa nan sino cu nos ta un pueblo luchado pa bay dilanti.
Reina Maxima tambe a expresa palabranan di gradicimento pa e organisacion y tur locual cu a wordo prepara pa nan yiu muhe durante su prome bishita na Aruba. Reina Maxima a expresa tambe cu nan bishita a culmina den broche de oro cu e parti carnavalesco na unda cu e tambe por a baila y sinti con Aruba ta celebra nos cultura, nos carnaval.
SAR Prinses Amalia tambe a expresa cu su bishita tabata un experiencia unico y ta sumamente contento y agradici cu e aprecio y e calor cu el a sinti di e pueblo di Aruba, specialmente di nos muchanan cu a demostra un aprecio y calor genuino na nos prinses. Esaki, SAR Prinses Amalia a expresa ta loke e ta hiba mas den su curason di su bishita na nos pais.
Nos ta mira atras riba dos dia di bishita di Famia Real hopi bon planifica y hinca den otro. Prome Minister ta gradici SM Rey Willem Alexander, SM Reina Maxima y SAR Prinses Amalia pa nan bishita. Prome Minister ta gradici señora Nicole Hoevertsz y henter Comision Real. Prome Minister a gradici S.E. Gobernador Alfonso Boekhoudt cu tawata anfitrion di bishita di Famia Real na Aruba. Tambe Prome Minister a gradici tur esunnan cu a traha duro pa haci bishita di Famia Real un exito. Y Prome Minister ta gradici pueblo di Aruba pa mustra nos miho cara pa laga nos huespednan Real y ekipo cu a acompaña nan, sinti nan mes den tur comfortabilidad.
