El Universal di Mexico y Omelete di Brasil a publica cu e serienan crea pa Roberto Gomez Bolaños, esta El Chavo, El Chapulin Colorato y Chespirito, a sali for di aire mundialmente dia 31 di juli 2020 y tambe a blokia nan riba varios website. Aunke no tin claridad riba loke a pasa, parce cu Televisa, compania pa cual Gomez-Bolaños a traha y unda el a realisa su programanan y e famia di e artista, no por a yega na un acuerdo riba e derechonan.
“E suspension ta debi na un problema pendiente na resolve cu e titular di e derechonan di e storianan,” Omelet a publica atrabes di un comunicado. Esaki ta e compania na Brasil cu ta emiti e produccionnan aki. E documento ta agrega cu e ta lamenta e decision, principalmente pa su audiencia, cu a sigui e serie fielmente durante asina tanto aña. “E stacion lo sigui apoya un acuerdo entre e dos companianan Mexicano mas lihe posibel y si esaki sosode, nos lo ta encanta di informa na e fanaticonan di El Chavo, El Chapulin Colorado y Chespirito mesora.”
Di su parti, atrabes di su cuenta di Twitter, Roberto Gomez Fernandez, yiu homber di Roberto Gomez Bolaños a skirbi: “Aunke tristo pa e decision, mi famia y ami ta spera cu pronto Chespirito lo t’ey bek riba pantayanan di mundo. Nos lo sigui insisti y mi ta sigur cu nos lo logra”. Mientrastanto, Graciela Gomez Fernandez, otro di e yiu muhenan di Gomez Bolaños, a bisa cu tabata increibel cu esunnan cu mas a beneficia cu e programanan di su tata, awe ta bisa cu nan no bal nada, pero no a referi na ningun hecho concreto y tampoco a nombra Televisa.
Actualmente na Venezuela ta transmiti “El Chavo” via Televen. Na Colombia nan tabata transmiti’e via RCN. Mientras cu Caracol ta emiti Chespirito y El Chapulin Colorado. E prome a emiti diasabra cu a pasa, e serie di dibuhonan anima Betty Toons, segun su oficina di prensa a informa. For di canal Caracol no a haya contesta ainda.
El Chavo (originalmente conoci como El Chavo del Ocho), ta un comedia di television Mexicano crea pa Roberto Gomez Bolaños, produci pa Televisa. A emitie como un serie independiente dia 26 di februari 1973 y su ultimo produccion tabata dia 7 di januari 1980. E serie a gana hopi popularidad na Hispanoamerica, Brasil, Spaña y otro paisnan. E cancion principal di e serie ta “El elefante nunca olvida” di Jean-Jacques Perrey, basa riba e Opera Turco di Ludwig van Beethoven.
E programa ta sigui e aventura di e personahe principal, un huerfano pober yama “El Chavo” (cu ta nifica “E Mucha”), interpreta pa e creador di e programa, Roberto Gomez Bolaños “Chespirito” y su amigonan, cu hopi biaha ta causa conflicto, di caracter comico, entre e demas habitantenan di un compleho di viviendanan ficticio di ingresonan abao of, manera cu nan ta yam’e na Mexico, e vecindad.
E idea pa e show a surgi door di Gomez Bolaños unda cu un mucha di 8 aña a discuti cu un bendedo di blaas den un parke, cual show a wordo transmiti pa prome biaha dia 20 di juni di 1971. E show tabata di gran importancia den e desaroyo di e personahenan, na cual el a asigna un personalidad distintivo. For di principio, Gomez Bolaños a dicidi di dirigi El Chavo na un audiencia adulto, apesar cu e programa riba su mes ta riba adultonan interpreta pa mucha.
E actornan principal tabata consisti di Gomez Bolaños El Chavo, Ramon Valdes Don Ramon, Carlos Villagran Quico, Maria Antonieta de las Nieves Chilindrina, Florinda Meza Doña Florinda, Ruben Aguirre Profesor Jirafales, Angelines Fernandez Doña Clotilde y Edgar Vivar Señor Barriga. E direcion y produccion di e serie tabata na encargo di Enrique Segoviano y Carmen Ochoa.
El Chavo a aparece pa prome biaha na aña 1971 como un boceto den e show di Chespirito, produci pa Television Independiente de Mexico (TIM). Na aña 1973, tras di e fusion di TIM y Telesistema Mexicano, Televisa a transmiti y a convertie den un serie semanal di mey ora, cu a prolonga te cu 1980. Despues di e aña ey, e cortonan a sigui draai den Chespirito te cu 1992. Den su popularidad mediado di decada di 1970, tabatin un audiencia Latinoamericano di mas di 350 miyon hende mirando cada episodio.
E doblahe Portugues Brasileño, Chaves, a inferi pa e cadena di television Brasileño SBT for di 1984, tambe por a mira den e versionnan Brasileño di Cartoon Network y Boomerang y actualmente tambe por mir’e riba Multishow. Desde dia 2 di mei 2011, a emitie na Merca via e red UniMas. Anteriormente a emiti’e riba e red ruman Univision y su predecesor e Red Internacional Española. A inclui un serie anima titula El Chavo Animado.
El Chavo a sigui ta popular cu episodionan cu un promedio di 91 miyon di espectador diario den tur e mercadonan unda a distribui’e den Latino America y Norte America. Desde cu a stop di produci’e na 1992, el a gana un calculacion di 1.7 mil miyon di dollar solamente cu Televisa. El Chavo tambe tabata disponibel riba Netflix na Merca, pero a elimin’e awor tambe.
