Desde cu Covid-19 a presenta su mes na Aruba, retonan a cuminsa presenta na tur porta. Tanto pa salud publico, pa nos economia, pa turismo y finalmente tambe pa finansa publico. Menos vuelo ta traduci den menos turista y menos turista ta bira menos entrada den nos economia, cu na su turno ta traduci den menos entrada den caha di Gobierno na impuesto. Asina cu entradanan di Gobierno cay, mesora mester atende cu e gastonan, cu si no ta baha mes lihe cu entradanan, formando un reto sin prescedente, no solamente pa Aruba, pero pa gobiernonan rond di henter mundo.
E entradanan total di Gobierno di Aruba a cay cu 49.5 miyon florin na juni 2020, un disminucion di 42.8% compara cu juni di 2019. Esaki ta debi principalmente na un caida di 27% di belasting riba interes (un caida di 11 miyon florin) y un caida di 43% di impuesto riba productonan basico den su mayoria, derechonan di importacion (un caida di 11 miyon florin) compara cu juni di 2019. Impuesto riba BBO/BAZV a cay un 49% (9 miyon florin) compara cu juni di 2019.
Den e prome seis lunanan di aña 2020, e entradanan total di gobierno a cay cu 30.6%, cu ta rond di 217.9 miyon florin, di 712.8 miyon florin na aña 2019 pa 494.9 miyon florin e aña aki.
E ingreso total di gobierno na 2019 tabata di 1.402.400.000 (1 biyon 402 miyon 400 mil) florin. Si e tendencia actual continua durante resto di e aña aki, anto Gobierno lo por mira un caida di entre 300 y 400 miyon florin den su entradanan total.
E relato aki, informacionnan y e graficonan, ta segun Banco Central di Aruba a anuncia den su informe mensual di juni di 2020. Pa mas informacion por subi nan website: https://www.cbaruba.org/cba/readBlob.do?id=6769
