Aruba mester drenta un relacion nobo den Reino Hulandes. Mester cumpli cu varios condicion a cambio di e ayudo cu Aruba mester. Entre otro den husticia y enseñansa.
Pa chauffeurnan di bus manera Beta Croes, e ta un continuo lucha na e momentonan aki por sobrevivi. E ayudo di Hulanda ta necesario. Awo tin biaha e tin cu warda dos ora prome cu su autobus por sali y sin cu e ta completamente yen. “Nos Arubianonan mester di ayudo di Hulanda.”
E ayudo di Hulanda ta hopi importante, den pensamento di Sandra Quandt, sinembargo e no ta algo cu mester bay na rudia p’e. E condicionnan ta hopi pisa. E no ta compronde tampoco cu Hulanda ta bini cu e condicionnan aki pa un prestamo cu Aruba ta paga bek, mientras cu nan a regala miyones na otro pais. “Pakico ora cu e otro partido tabata t’ey a duna nan sin tuma medida ….,” Quandt a bisa. Y a agrega awo kier pone condicion y interveni. “Ami lo no acepta pa nan interveni na Aruba.”
Luidy Lekkerbek ta un di esnan cu no tin problema pa Hulanda interveni. “Nan lo kier pone ordo den e asunto y esey ta comprendibel.” Pero, tambe e ta bisa, cu mester mira kico realmente Hulanda a pidi, pasobra un banda ta bisa cu a pone condicion y e otro ta bisa cu no. Ora cu tin tur cos poni riba papel, tur hende por duna nan opinion na e momento ey.
E pensamento tambe ta existi ta di con Hulanda por yuda otro y Aruba no, y si nan ta di acuerdo pa haya cooperacion por medio di ayudo tecnico di expertonan.
