Den siman di vakantie di oktober muchanan a pasa pret na Museo Arqueologico Nacional Aruba. E programa vacacional “Riba un trip Caribeño” a trece diferente mucha hunto na Museo pa experiencia un poco kico ta lasonan caribense.
Mientras a haci yen di actividad creativo nan a siña na un manera recreativo un tiki mas di nos antepasadonan y di e herencia cultural comun entre e hende y culturanan indigena y e historia comun di e region di Caribe.
E tres maintanan di e programa e muchanan a haci entre otro un speurtocht educativo den e exposicion “Caribbean Ties” den cual gruponan a competi cu otro y yen di animo a rondea e contestanan, asina siñando di nos herencia historico comparti. A haci wega den e tema di un trip caribeño, manualidad, traha instrumentonan musical inspira riba instrumentonan indjan y nan a siña weef manera indjan.
Dos ‘highlight’ di e programa tabata e mini “curso di kalki” y e tayer di traha pochi di klei. Den colaboracion cu Stichting Monumentenfonds, Parvenir Restauration y Stichting Rancho, e muchanan a haya e oportunidad unico di bishita e forno di kalki durante e periodo cu e restauracion ta tumando lugar, na unda e muchanan a haya un splicacion y demostracion con ta traha cu kalki. E muchanan a compronde e importancia pa conserva e forno di kalki y e importancia pa comparti conocemento pa asina esaki no bai perdi y cu den e caso aki hasta personanan di un otro parti den region di Caribe, esta Trinidad a bin te na Aruba pa comparti e conocemento con pa restaura cu e material original di kalki cu nos. Pues un bunita ehempel di lasonan caribeño den practica.
Artista local Trudy Lampe a duna un tayer fantastico na e muchanan unda nan mes a siña traha pochi di klei arubano, usando tecnicanan cu indjan na Aruba y den otro parti di Caribe tabata usa. E muchanan a goza masha hopi mes pa traha cu klei y cu orguyo a crea potchinan masha artistico.
Decora cu stempel di replica di stempel original di indjan di Aruba, bou sonido di ‘tinklers’ y ‘shakers’ cu nan a traha, e”indjannan chikito” a clausura e programa di vakantie hopi contento. Museo Arqueologico Nacional Aruba ta sigui ofrece actividadnan educativo y recreativo pa publico. Sigui nos riba facebook Archeo Aruba of National Archaeological Museum Aruba pa mas informacion. Scolnan y otro gruponan cu ta interesa pa bishita e exposicion temporario internacional “Lasonan Caribense, hendenan conecta, antes y awor” por tuma contacto cu Museo Arqueologico pa traha cita pa un bishita.
