Teddy Gibson, di nacionalidad Canades y deteni pa 2 aña y mey caba pa asesinato cu a tuma luga 30 april / 1 di mei 2017 na Jaburibari, lo scucha dia 28 di october awo pa 2’or di merdia su sentencia. Fiscal a pidi un castigo di 15 aña.

Un castigo cu a wordo cuestiona door di Abogado mr. Zuhaila Arendsz Marchena, kende tabata e Abogado nobo di acusado Teddy Gibson. Kico tabata e motibo cu Gibson a mata Eric Quach, kende ta e unico cu a yud’e aki na Aruba y tambe haci plan pa e bolbe Canada? Den e procesverbaal no ta aparece ningun motibo pa esaki.

Sospechoso asesinato: Mi ta prefera condenami siendo inocente en bes nan mata mi famia.

Sospechoso asesinato: Mi ta prefera condenami siendo inocente en bes nan mata mi famia. Click link pa mas https://24ora.tv/2VzRxWE

Posted by 24ora on Friday, October 11, 2019

E asesinato aki a tuma luga e mesun dia cu un grupo di Canades a yega Aruba pa supuestamente topa cu Eric, kende segun ta aparece den e PV, no solamente a bini pa fiesta, pero tambe tabatin hopi placa den su poder y deal den droga. Pues na e cas tabatin algun persona cu record na Canada, cual ta e motibo cu Abogado mr. Zuhaila Arendsz ta cuestiona di con Polis y OM no a coba mas profundo riba e tres declaracionnan duna, busca filmacion di camaranan den bisindario,etc. Di con un di esnan presente a core bay aeropuerto diadomingo mainta tempran tratando di cumpra un pasashi pa bay Canada bek. Di con su man tabata tur mancha na polvo di arma di candela, y di con a lague bay asina mes.

Pero tambe a bini dilanti durante tratamento, un di esnan presente a duna un declaracion cortico y despues a hala atras, esta Tien Ngo, conoci como Jimmy. El a bisa Polisnan despues cu “mi ta sigur cu boso lo soluciona e caso aki sin mi declaracion”.

Pa e Abogado e declaracionnan ta demasiado mucho mescos cu otro, indicando cu parce a palabra kico ta bay bisa.

Loke cu a pasa e dia ey ta: Den e cas tabatin dies persona, bebiendo y uzando droga. Dado momento e grupo di homber a bay ariba y e muhenan a keda abou. Despues un ta baha y bolbe subi cada rato te ora cu dado momento Teddy Gibson a baha pa coy e arma di Eric abou. Prome cu el a subi e lo a bisa Yvonne cu “mi mester haci algo y lo haci algo” y despues a hinca e arma den su banchi di carson, subi trapi bek. Esnan ariba ta bisa cu Teddy a para dilanti Eric y a los tiro direccion di su cabes.

Tur movecionnan despues tabata straño manera cu kier a tapa e sucedido, a haci den e camber limpi, a hinca tur e muhenan den auto, cu excepcion di Vanessa cu ta amiga di Eric, pa hiba nan bek nan apartamento, no tabata kier pa ningun mira number di e auto y a kita telefon for di Vanessa. Pero tabata net Vanessa kende a yama Polis y informa kico a pasa.

Ora cu e hombernan a bolbe na e sitio, a topa cu Polis y a core deshaci di e arma y a drenta mondi pa sconde. Despues dos di nan a acerca Polis y a bisa cu nan a wordo atraca. E otronan a wordo deteni, despues di a saca nan ekipahe y tabata rumbo pa keda na apartamento di Teddy Gibson.

Kende a tira? Segun Abogado Marchena, Polis mester a investiga tur hende y asina lo a haya sa cu Gibson no ta e unico sospechoso. Esun cu yama Kevin a wordo husga na Canada pa dos asesinato; Eric mes ta wordo busca na Canada pa asesinato. Pero Jessy Orr y Jimmy tambe tabata cera hunto den prizon na Canada. Tanto Jimmy (na maart 2018) como su tata a wordo likida na Canada. Tur esaki mester tabata motibo pa investiga tur hende miho. E tin e impresion cu OM mucho lihe a conclui cu Gibson ta esun cu a tira.  

Na final e Abogado a bisa cu su cliente tabata sinti su mes hopi bou presion, pa cual no a declara anteriormente na Polis. “ E version mes di kico a pasa realmente e anochi ey, kisas nunca nos lo haya sa.” E acusado mes dado momento durante tratamento di e caso a bisa Hues: “Mi ta prefera di wordo condena siendo inocente, en bes cu mi famia wordo mata”.

Fiscal a basa su alegato riba e declaracionnan duna door di e testigonan y a haya cu mirando e distancia for di unda a los e tiro, esaki tabata demasiado cerca y tabata tin e meta pa mata Eric. Pa esaki el a pidi un castigo di 15 aña.

Dia 28 di october awo pa 2’or di merdia lo tin sentencia den e caso aki.

Comments

comments