Diamars den careda di 3:20pm Polis y ambulance a bay cu urgencia na Marriott Surf Club pa atende cu un mucha muhe, di edad entre 17 pa 19 aña, kende a hera hoga den pool. Pa un motibo of otro e mucha muhe a bay for di tino den e pool y a guli hopi awa. El a keda bou di awa pa mas o menos 2 minuut.
Dos señora a bin ripara cu e damita ainda ta bou awa y mesora a purba sac’e. Un turista femenino a mira kico tabata pasando y di biaha a cuminsa grita y pidi tur cu ta eybanda pa yudansa. Mientras cu tabata warda e yegada di ambulance, e damita tabata scuma for di boca. Un homber cu tabata eybanda a yega cerca y a cuminsa practica CPR.
Ora polis y dos ambulance a yega na e sitio, a informa nan cu un homber a cuminsa duna e mucha muhe CPR, cual a yud’e reacciona. E paramedico di ambulance a keda duna e mucha muhe e atencion necesario te ora cu e por a cana subri riba e stretcher, mientras cu polis tabata papia cu e mama pa calm’e. Despues cu a pon’e den ambulance, a transporta e mucha muhe hunto cu un miembro di su famia pa hospital pa sigui haya e cuido necesario.
