Un mucha homber di apenas 17 aña di edad a yega e departamento di Spoedeisendehulp na Hospital awe den ambulance, despues cu un homber cu cabey “dreadlocks” a hink’e na boatfest. E victima mes tabata burachi, pero ta corda si ken a hink’e. Su situacion ta stabiel.
Kico a conduci na e acto aki no ta conoci. Hecho ta cu a hinca e hoben 5 biaha. A perfora su pulmon cu e arma blanco. E sospechoso tabatin intencion masha serio pasobra el a hinca e victima mas di un biaha banda di su curason, pero no a logra perfor’e.
Hopi caso di muchanan burachi
Hospital a atende varios caso awetardi y awenochi ainda di menornan di edad intoxica cu alcohol. Ambulance a trece un mucha muhe di 14 aña completamente for di tino. E tabata drumi na beach pero no tabata reacciona. A pone na aw’i bida pa por baha e nivel excesivo di alcohol den su curpa. No sa si e mes a bebe tanto of si a tira algo den su bebida. A pidi Slachtoffer Hulp pa asisti e mucha, pasobra como cu e ta menor di edad y a yega sin su mayornan, e ora e procedura ta cu Gobierno ta tuma over, te ora identifica e mayornan. Ey lo mester atende con por laga un yiu muhe di 14 aña bay su so na un evento pa adulto, den cual tin consumo di alcohol.
