Durante conferencia di prensa Minister Presidente mr. Evelyn Wever-Croes a duna su punto di bista riba e aanwijzing cu diabierna awo lo ta trata den Rijksministerraad. Gobierno su meta desde principio ta pa evita e aanwijzing.
E mandatario a indica cu diabierna awo, 21 di october, riba agenda di Rijksministerraad pa Aruba. Desde principio gobierno su input ta pa evita e aanwijzing. A cana diferente trayecto y un di nan tabata e zienswijze, cual nan mester a defende contra e aanwijzing.
Defensa di gobierno tabata uno hopi huridico. Segun minister presidente, huridicamente un aanwijzing aworaki, na su opinion, no ta posibel. Tambe e tin contenido tecnico di e parti financiero. E mandatario a indica cu nan a sigui traha pa baha e deficit mas ainda.
Manera a entrega e deficit den e cambio di presupuesto cu ta bayendo na parlamento, segun Wever-Croes, esaki a baha di 227 miyon pa 148 miyon. E ta canando su caminda, esta bay Raad van Advies, pero gobierno a logra bah’e mas ainda. Esaki ta rond di 112 – 113 miyon di florin. Esey ainda no ta poni riba papel pa bay parlamento, pero lo manda esey den un nota di cambio. Gobierno ta trahando pa baha esey mas ainda, p’asina no tin motibo pa haya un aanwijzing.
E ta riba agenda y esaki ta e siman di dje. El a enfatisa cu nan a y ta luchando dia den dia afo pa evita di haya un aanwijzing. Nan mester warda pa diabierna y mira kico ta bay pasa.
