Movimiento Misionero Mundial Aruba a organisa dos dia di poder y alabansa, auspicia pa Hobennan Guerrero di Dios MMM, unda cu nan a trece e mensahe y speransa na tur bario di Aruba cu ta den un necesidad spiritual.
Pastoor Darren Richardson, di Iglesia Peteconstal Movimiento Misionero Mundial, cu sede na San Fuego, Santa Cruz, a conta cu mirando e necesidadnan cu tin den e barionan di Aruba, den mayoria di e barionan no solamente tin necesidad fisico, necesidad social, sino tin un necesidad spiritual hopi grandi den e barionan.
Por mira cu e situacion di hopi hogar ta den e manera cu nan ta awe, pasobra hende lamentablemente a bira lomba pa Dios y no tin un conscientisacion di Dios den e famia, den e hogar.
Ta pa e motibo aki mes MMM a drenta den e barionan pa papia cu nan tocante di Dios y nan necesidad cu nan tin di Dios.
Hende di tur caminda
Richardson ta sigui splica cu tin diferente hende di e diferente areanan di Aruba. Tabata tin di San Nicolas, Piedra Plat, Tamarijn, tambe logicamente di e bario di Sabana Basora, kendenan tabata presente durante e actividad cu a tuma luga na riba e cancha di basketball na Sabana Basora mes diahuebs y diabierna ultimo.
Cuanto biaha ta haci e encuentro
Segun pastoor Richardson no tin un tempo fiho, pero cada tanto tempo nan ta move den e barionan di Aruba. Tabata tin uno recientemente na Noord Cura Cabay. Tabata eynan algun luna pasa y tin e intension un biaha mas den luna di maart, ta den e bario aki treciendo e conscientisacion na hende cu nan mester di Dios pa tin un cambio real den nan bida.
Hobennan activo den spiritualidad
Kelvin Tromp, ta un lider di hoben di Movimiento Misionero Mundial y el a comenta cu nan tabata den Sabana Basora partiendo invitacion na cada cas. E hobennan a sa di bin cerca y nan tabata memey di tur, disfrutando di e campaña cu nan tabata tin.
