Apenas algun rato despues di a corona Antoni Gario como Rey di Soca pa carnaval 2020, cu mesora controversia a cuminsa. Parce cu den un entrevista cu e compositor, areglista y cantante “Black Diamond” di e banda Le Groove, e lo a bisa cu nan ta cla pa bay celebra Dia di Aruba na Hulanda otro luna.
Den esey el a expresa e deseo pa henter su banda bay y no e so. Wel, Minister Plenipotenciario Guilfred Besaril, cu a keda lanta henter marduga pa mira e festival, a reacciona rabia riba su Facebook, cu entretanto el a kita caba si, awo cu e lo a lanta di soño y ta mas “sober”.
E mandatario, obviamente un fiel fanatico di musica pero no necesariamente di Le Groove of Antoni Gario, a opta pa contesta den un forma fuerte y hasta cuestionabel pa un mandatario, contra e cantante. E reaccion aki a causa hopi rabia den comunidad, tanto di fanaticonan di Gario como esunnan cu no ta gust’e. E discusion ta: E ganado mester bay Hulanda, sea Minister Besaril ta gust’e of no. No ta cu placa di e Minister ta paga pa bandanan y cantantenan sino ta placa di pueblo!
Di otro banda, ta sinti mas bien un rabia bieu di Besaril contra Gario. Ta conclui esaki pasobra mas trempan, durante marduga/mainta na Hulanda cu e mandatario tabata disfruta di su Soca Festival, ya caba el a los un comentario insinuando cu Gario mester pidi’e despensa prome cu e pensa di bay Hulanda. Obviamente Besaril no tabatin e curashi e ora ey ainda, anochi tabata jong, pa bisa cu ta SU opinion pero a bent’e riba un amigo.
Henter e discusion innecesario aki ta debi na e pregunta cu si ta Rey di Soca so mester bay canta su Soca ganado durante Aruba Dag of ta e banda completo mester biaha cune. E Minister nobo di Aruba Huis a cambia e maneho y ta opta pa hiba un banda amigo di dje y ta obliga e cantantenan pa canta cu e banda. Aña pasa el a hiba Buleria por ehempel cu a compaña e Rey di Tumba 2019, Rocco Franken.
E aña aki, e Minister a compromete su mes caba pa hiba Delicious, sin cu nan a gana ni Festival di Tumba (ainda), ni Caiso y ni tampoco Soca. El a mustra tur banda y cantante cu na final, ta keda su decision ken e ta hiba Hulanda pa Aruba Dag. E mandatario a haci esaki durante un fiesta di e banda na Balashi Beergarden. Cu e movecion aki a keda demostra cu no necesariamente lo manda e ganadonan Hulanda, sino e bandanan cu ta “miho” cu e Gobierno na mando.
E realidad ta cu e discusion aki a lanta hopi interogatorio den comunidad, si esaki ta prioridad di Gobierno, un fiesta cu pa hopi ta un forma di “gastamento di placa”. Gobierno a subraya di a baha e gastonan drasticamente y cu ta busca patrosinadonan pa cubri e evento aki. Mayoria patrosinio sinembargo ta sali di Aruba mes y di cual un gran parti, si no ta tur, ta mesun companianan di Gobierno.
Pa Antoni Gario, e ta di opinion cu e no a gana su so, sino cu henter su banda. Como tal, si Gobierno di Aruba ta honr’e cu e premio, lo mester honra henter e banda tambe. Si acaso no ta paga pa Le Groove bay Hulanda, e lo prefera di keda Aruba. Aña pasa tabatin e mesun discusion pero na final Tony Mingo a opta pa toch bay su so Hulanda, sin Le Groove cu a compañ’e henter carnaval. Gario a “tag” Minister Dangui Oduber den su publicacion riba Facebook, pues no sa si kisas ATA of AAA of APA lo duna un man pa e banda asina popular di San Nicolas.
