Diabierna anochi mas o menos 11:00pm a sosode un accidente riba Kamerlingh Onnesstraat, pafo di “Blue Moon”. Un motorcycle marca Harley Davidson coriendo duro riba e caminda aki a alcansa un peaton. Ta trata aki di trompetista di D’-Licious cu net tabata bandondo e sitio despues di haci su presentacion den e fiesta “Spula Krijt”.
Durante investigacion di Polis na e sitio, a compronde cu e musico Giovanni Pastor di D’-Licious tabata crusando caminda pa bay hiba su ekiponan den auto, ora un motorcycle a atropey’e. E Harley Davidson tabata biniendo di Noord den direccion di Cas Casuela. E trompetista tabata cu su tas den man ora e motorcycle a dal’e. Tur su ekiponan den tas a cay abou. E victima a haya sla na lomba.
A nota cu ambos partido a intercambia number di celular pa regla e daño cometi na e musico. Ambulance a presenta pa haci un control riba e tocado, cu a haya sla minimo, pero si tabata sinti dolor na lomba.
