Tabata alrededor di 9.20PM ora Polis a para Taxi-346, un auto marca Hyundai modelo Santa Fe, na altura di rotonde dilanti Aeropuerto. Parce cu Polisnan motorisa, encarga cu control di trafico, a sigui e Taxista for di rotonde Ser’i Tijshi te cu rotonde Aeropuerto.
E chauffeur tabata core hopi malo riba caminda. Tambe e tabata core den e “lane” banda robes. Polis a splic’e bon cla cu esaki no ta corecto. E “lane” links ta solamente pa ora cu kier pasa un auto (haal in). Durante e control Polis a ripara cu e chauffeur “su lenga tabata pisa”.
A detene e taxista mesora pa stuur auto burachi y den e auto di CEA a transport’e pa Warda di Polis caminda un Sub Fical lo dicidi kico ta bay para cu su detencion. E por spera un bon multa tambe pa stuurmento di auto burachi. Den casonan asina Departamento di Transporte Publico, DTP, tambe ta start un investigacion interno, mara na e reglanan pa un persona por haya un permiso di Taxi. No por ta asina cu un turista ta subi un Taxi cu confiansa cu e chauffeur por hib’e di un punto pa otro, sin sa cu e chauffeur ta burachi y mas bien ta trece nan bida na peliger. Ta un asunto serio cu mester regla mesora, sin cu tin influencia politico pa “pone man riba cabes” di ningun Taxista burache. |