Diamars mainta partido RED a ofrece un declaracion na prensa relaciona cu e caso di SKOA. Presente pa esaki tabata politiconan di e partido Rudy Lampe y Ricardo Croes dilanti di entrada di Parlamento. Lampe tabata esun pa hiba palabra indicando cu e diferencia entre otro scolnan y esunnan cu ta cay bou di SKOA.
Otro scolnan si ta funcionando bon cu e subsidio ricibi, kier men ta SKOA ta e unico cu e problema. P’esey e lider di RED a califica como tristo ora cu parlamento ta bin cu mocionnan cu ta bay contra decision di hues.
“Si analisa loke prome minister a trece dilanti den parlamento, el a gaña parlamento. Ora cu un prome minister gaña parlamento, esey yama politieke doodzonde, paso esey no ta aceptabel. Pakico el a gaña atrobe? Paso el a bisa cu su carta dos dia prome cu eleccion tabata pa scapa trabou di e werksternan. Esey ta mentira paso e carta ey ta bisa cu e werksternan mester tuma nan retiro di SKOA pa despues tuma nan den servicio como ambtenaar na Bureau Traimerdia y di eynan pone nan ter beschikking di SKOA.”
Wever-Croes a bisa esey sabiendo cu el a firma cu Hulanda y presenta e plan di baha gasto di personal caminda ta para cu no ta tuma mas funcionario den servicio. Anto dos dia prome cu eleccion bo ta firma pa nan tuma retiro di SKOA pa bira ambtenaar. El a tuma e werksternan haci, segun Lampe, paso e tabata sa cu e no por tuma nan den servicio como funcionario. Esey ta gañamento y el a hacie dos dia prome djis pa gana voto.
Pa mas di e declaracionnan di Lampe awe mainta, lesa e proximo edicion di TREMPAN.
