Desde dialuna mainta trempan, e trahadonan di Serlimar ta den welga y awe diaranson, no ta un excepcion. Na momento cu a notifica minister Ursell Arends di e situacion, e no a perde pa gana y a bay atende cu e asunto personalmente. El a sa di bay y a haya sa for di e trahadonan kico ta nan preocupacion y dolor.
Den un entrevista cu noticiero Enfoke, e mandatario a comenta cu Serlimar p’e, ta un ‘case study’ perfecto pa corupcion.Pa hopi aña tabatin metemento politico y esaki a conduci na unda Serlimar ta aworaki. Mester tin un structura, un liña directo con pa maneha un compania estatal.
Minister ta deal cu Raad van Toezicht. Na su turno Raad van Toezicht ta deal cu gerencia y gerencia ta deal cu empleado.Den pasado semper por a mira cu fuera di tabatin malgastamento di placa, tin metemento politico directo den con ta maneha compania estatal.
Na 2005, na momento cu a haci Serlimar Sui Generis, un di e puntonan cu e tempo ey ex-minister Candelario ‘Booshi’ Wever a uza, ta netamente elimina metemento di politica den compania.
Diesseis aña despues por mira lamentablemente cu e punto aki no por a resolve, door di a converti e compania den un Sui Generis.Diabierna anochi laat, minister Arends a ricibi un carta di sindicato STA. A manda e carta aki pa prome minister y a comparti cu minister Arends, kende a bisa di biaha cu lo tackle esaki na un forma adecua.
Arends tabatin combersacion diadomingo cu representante di e sindicato, presidente Diego de Cuba, y a sigure cu si e trahadonan welga, minister Arends lo t’ey.A tuma contacto cu Raad van Toezicht, mirando cu e tin cu mantene su mes na e regla di ‘Corporate Governance’. Arends no por bay mete directamente den e compania. A acerca Raad van Toezicht, informa y puntra nan cu si por informa gerencia pa bisa nan cu e trahadonan ta bay welga.
Minister Arends kier a bay scucha nan inkietud personalmente. E carta diabierna tabatin seis punto. Dialuna a haya un otro carta cu un total di 15 punto. Basicamente loke e trahadonan ta señala, nan kier sa di nan futuro. Actualmente no por garantisa futuro di Serlimar. T’e trahadonan so por yuda garantisa e futuro.