Minister Chris Romero a desmenti noticia di 24ora.com cu ta buscando un compania forensico den exterior pa investiga Arubus, AruPark y AruTram entre aña 2009 pa 2017. Di nos banda nos ta RETA e Mandatario pasobra nos ta sigur cu nos fuente, cu ta den su mesun Ministerio, no tin motibo pa yama nos y gaña nos e noticia aki. Probablemente e mandatario no sa mes kico ta sosodiendo den su Ministerio y kico ta e investigacionnan andando di cual ordo ta bini for di top di partido MEP.
Ayera nos a publica cu lo haci un investigacion forensico den e companianan estatal di transporte publico. Locual a sosode ta cu e mandatario encarga e tempo ey ta e propio Otmar Oduber. E ta e yabi awendia di e Gobierno di MEP-POR-RED y como tal awe a tuma contacto cu liderazgo di MEP riba e informe aki y mesora a instrui Minister Romero pa sali desmenti. Asina a sosode algun dia atras tambe ora cu Hendrik Tevreden a sali cu hopi “speed” contra e mocion di RED pa cu Cannabis y despues mester a aclaria su posicion pa evita kiebra den Gobierno.
Pero aki si e hoben politico Chris Romero a faya! E tin cu compronde cu esaki no ta un media di cual Gobierno ta controla y como tal nos ta rete tur dia riba e noticia aki. Si e presenta mas na trabou, e lo sa cu den su Ministerio tin top conseheronan cu no tin un amor mucho special pa Minister Oduber, specialmente debi na casonan den pasado.
Locual ta mas pret den esaki ta cu e Minister sa ken ta nos fuente, a yame reclame awe dicon el a duna 24ora.com e primicia pero awor aki, pa “salba” coalicion, ta core desmenti e informe.
Mensahe na Chris Romero: Pasenshi, nos tin mas noticia saliendo e siguiente dianan aki di Bo mesun Ministerio, di varios decision cu “nan” a tuma den Bo ausencia. Pues, prepara pa desmenti mucho mas!
